جىل سوڭىنا دەيىن لاتىن ارپىندەگى قازاق ءالىپبيىنىڭ گرامماتيكا ەرەجەلەرى بەكىتىلەدى

استانا. قازاقپارات - وسى جىلدىڭ سوڭىنا دەيىن لاتىن قارپىندەگى قازاق ءالىپبيىنىڭ گرامماتيكالىق ەرەجەلەرى بەكىتىلەدى.

 بۇل تۋرالى الماتىدا «قازاق ءالىپبيىن لاتىن گرافيكاسىنا كوشىرۋدىڭ وزەكتى ماسەلەلەرى» اتتى عىلىمي- تاجىريبەلىك كونفەرەنسيادا ايتىلدى.

 قازىرگى تاڭدا عالىمدار ارنايى تۇجىرىمداما ازىرلەپ جاتىر. سونىڭ نەگىزىندە ءتيىستى ەرەجەلەر جاريالانادى. ول انا ءتىلىمىزدىڭ دىبىستىق جۇيەسى مەن زاڭدىلىقتارىن ەسكەرە وتىرىپ، جاسالادى. لاتىن گرافيكاسىنا بۇرىنىراق كوشكەن تۇركى حالىقتارىنىڭ جەتىستىكتەرى مەن كەمشىلىكتەرى دە ەسكەرىلەدى. دەگەنمەن، عالىمدار «ەرەجەلەردى تۇبەگەيلى بەكىتپەي تۇرىپ، كەيبىر دىبىستاردىڭ تاڭبالانۋىن تۇپكىلىكتى شەشىپ الۋ كەرەك» دەيدى.

زەينەپ بازاربايەۆا، فيلولوگيا عىلىمدارىنىڭ دوكتورى، پروفەسسور:

 - ەرەجەلەر، زاڭدىلىقتار -  ءبارى دايىن بولعاندا ونى تانىستىرۋ كەرەك قوعاممەن. سوندا ولار دۇرىس جازىپ كەتەدى. سەبەبى جازۋ دەگەن بولەك، ايتۋ دەگەن بولەك. ورفوگرافيا - ول وتە كۇردەلى سالا. ساۋاتتى جازۋ ءۇشىن ورفوگرافيانىڭ عىلىمي نەگىزىن ءبىلۋ كەرەك جانە ءارىپ، فونەما، دىبىس دەگەن ۇعىمدار بار، سولاردىڭ قارىم- قاتىناسىن جاقسى ءبىلۋ كەرەك.

www.24.kz