ارالدا زەينەتكەر ارا ءوسىرۋدى قولعا الدى

 قازالى. قازاقپارات - قىزىلوردا وبلىسىنىڭ ارال اۋدانى قۇمبازار اۋىلىنىڭ تۇرعىنى سەرىك ياكۋدايەۆ ارا ءوسىرۋدى قولعا الدى، دەپ حابارلايدى قازاقپارات ءتىلشىسى.

42 جىل ۆەتەريناريا سالاسىندا قىزمەت اتقارىپ، زەينەت دەمالىسىنا شىقان ول ارا ءوسىرۋ ىسىنە دەن قويدى.

« قىزىلوردا قالاسىنا بارىپ، ومارتاشىلاردان ساباق الىپ، 15 كۇندەي ارنايى كۋرستاردا وقىپ قايتتىم. ارا شارۋاشىلىعى مەنى بىردەن- اق باۋراپ الادى. ابدەن ىزدەنىپ، جان- جاقتى سارالاعان سوڭ، بار ءبىلىم- بىلىگىمدى سالىپ، بيزنەس جوسپار دايىندادىم. جوسپارىن «اتامەكەن» كاسىپكەرلەر پالاتاسىنا ۇسىنىپ، كوپ ۋاقىت وتپەي- اق، جوبا ۇزدىك دەپ تانىلدى. ءسويتىپ، ماعان «دامۋ» قورى قايتارىمسىز گرانت تاعايىندادى»، - دەيدى سەرىك ياكۋدايەۆ.

كاسىپكەر «دامۋ» قورى ارقىلى 1 ميلليون 275 مىڭ تەڭگە قايتارىمسىز گرانت ۇتىپ العان سوڭ، اتالعان قارجىعا 20 ۇيا «كارپات» تۇقىمدى ارا مەن بال وندىرۋگە قاجەتتى قۇرال- جابدىقتاردى ساتىپ الدى.

«قاسىما كومەكشى رەتىندە ءبىر جۇمىسشى بەكىتتىم. باستاپقىدا جەرگىلىكتى اۋا رايىنىڭ قۇبىلمالىعى ارالاردىڭ ۇيرەنىسۋىنە قيىندىق تۋعىزدى. سوندىقتان، ولاردى 20 كۇندەي قولدان ءشاربات دايىنداپ باقتىم. ارتىنشا، داريانىڭ جيەگىنە اپارىپ ورنالاستىردىم. مۇندا ولارعا ازىق بولارلىق جىڭعىل، الما، ورىك، شيە گۇلدەپ جاتىر. ارالار بال جيناۋدى باستاپ كەتتى»، - دەيدى ومارتاشى.

س. ياكۋدايەۆتىڭ ايتۋىنشا، ارالار تەمەكى مەن ىشىمدىكتىڭ، ءاتىردىڭ ءيىسىن جاقتىرمايدى. ۇنەمى قوزعالىستا بولادى.

«ارالار تازالىقتى جاقسى كورەدى. ۇياسىنىڭ ىشىنەن ءبىر ارانىڭ ولەكسەسىن، بولماسا باسقاداي قوقىستاردى كەزدەستىرمەيسىڭ. ال، شەبەرلىگىنە ءتىپتى تاڭ قالاسىڭ. ءبىز رامكاسىن جاساپ، بەتىنە ارنايى جابىستىرعىش داكەنى بەكىتەمىز دە ونىڭ ۇستىنە ارالار التى بۇرىشتى ەتىپ بال جينايتىن ۇياشىقتارىن ءورىپ شىعادى. بۇل جۇمىستارى ادام قولىمەن جاساسا دا، مۇنداي ءمىنسىز شىقپاس ەدى»، - دەيدى ومارتاشى.

مامىر ايىنىڭ ورتاسىنان باستاپ تامىز ايىنا دەيىن جينالعان بالدى الۋعا مۇمكىندىك بار. ءبىر ۇيادان اپتاسىنا 6-7 كەلى بال الىنسا، ءبىر ماۋسىمدا 100-200 كەلىگە دەيىن بال قولعا تيەدى.

«مەن بۇل كاسىپتى قولعا العاندا تولاعاي تابىسقا كەنەلسەم دەگەن جوقپىن. قۇدايعا شۇكىر، بالالارىمنىڭ ءبارىن ءۇيلى- جايلى قىلدىم. ءوزىم دە زامانىمدا ەڭبەگىممەن حالقىما ابىرويلى بولدىم. وسى كاسىبىم جاندانىپ كەتىپ جاتسا، جەتىم- جەسىرلەرگە، مۇگەدەك جاندارعا، مەشىتكە، جاعدايى تومەن وتباسىلارعا كومەك كورسەتسەم دەيمىن. بۇلاي جاساۋعا مىندەتتىمىن دە. ويتكەنى، قۇرانداعى ارا سۇرەسىندە: «ارادان تۇسكەن پايدانىڭ ون پايىزىن مۇقتاج جاندارعا، ون پايىزىن تۋىسقاندارعا كومەك رەتىندە بەر»، دەلىنگەن. جانە بازارعا بارا قالساڭ، ءتۇرلى قوسپامەن جاسالىپ كەلگەن سىرتتىڭ ونىمدەرىن الامىز. وسىنى دا ەسكەرىپ، اۋدان حالقىن تابيعي تازا ونىممەن قامتاماسىز ەتسەم»، - دەيدى كاسىپكەر.

اۆتور: سارسەنقۇل نازار