ەنەرگەتيكا ءمينيسترى «سارى ارقا» گاز قۇبىرىنىڭ قۇرىلىسى قاشان باستالاتىنىن ايتتى

استانا. قازاقپارات - «سارى ارقا» ماگيسترالدىق گاز قۇبىرىنىڭ قۇرىلىسى سالتاناتتى تۇردە بيىلعى شىلدەدە باستالادى.

بۇل تۋرالى ماجىلىستەگى ۇكىمەت ساعاتىندا ق ر ەنەرگەتيكا ءمينيسترى قانات بوزىمبايەۆ ءمالىم ەتتى، دەپ حابارلايدى قازاقپارات ءتىلشىسى.

 «سارى ارقا» گاز قۇبىرىنىڭ قۇرىلىسىن سالتاناتتى تۇردە بيىلعى شىلدەدە باستاۋ جوسپارلانىپ وتىر. « قىزىلوردا- جەزقازعان- قاراعاندى- تەمىرتاۋ- استانا» باعدارىنداعى ءبىرىنشى كەزەڭ 2019 - جىلدىڭ جەلتوقسانىنا دەيىن اياقتالادى»، - دەدى مينيستر.

وسى ورايدا، ول جوبانىڭ ءبىرىنشى كەزەڭىنىڭ قۇنى 267 ميلليارد تەڭگەگە باعالانىپ وتىرعانىن ەسكە سالىپ ءوتتى.

 «جۇمىس توبىمەن بارلىق مۇددەلى تاراپتاردىڭ قۇزىرەتتەرى بەكىتىلدى. قاراعاندى، اقمولا وبلىستارىنىڭ جانە استانا قالاسىنىڭ اكىمدىكتەرىمەن ينفراقۇرىلىم قۇرىلىسىنا قاتىستى جول كارتالارى دايارلاندى. ءبىرىنشى كەزەڭدە 171 ەلدى مەكەن قامتىلادى دەپ كۇتىلۋدە. وسى ارقىلى، جوبا جۇمىس قارقىنىن ارتتىرۋعا جانە بولاشاقتا قازاقستاننىڭ بارلىق اۋماعىن گازبەن قامتاماسىز ەتۋگە جول اشادى»، - دەدى بوزىمبايەۆ.

ونىڭ سوزىنە قاراعاندا، بۇگىندە ەلىمىزدە گازداندىرۋ دەڭگەيى 47,4 پايىزدى قۇراپ وتىر. وسى ورايدا، 1320 ەلدى مەكەن گازعا قول جەتكىزدى.

 ەستەرىڭىزگە سالا كەتەيىك، قازاقستان پرەزيدەنتى نۇرسۇلتان نازاربايەۆ بەس الەۋمەتتىك باستامانى تانىستىرۋ بارىسىندا  قىزىلوردا وبلىسىنان استاناعا قاراي گاز قۇبىرى تارتىلاتىنى تۋرالى جاريالادى.

اۆتور: رۋسلان عابباسوۆ