قازاقستان مۇناي ءوندىرۋ كولەمىن ارتتىرادى - ەنەرگەتيكا ءمينيسترى

استانا. قازاقپارات - قازاقستان مۇناي ءوندىرۋ كولەمىن ارتتىرادى.

بۇل تۋرالى ماجىلىستەگى ۇكىمەت ساعاتىندا ق ر ەنەرگەتيكا ءمينيسترى قانات بوزىمبايەۆ ءمالىم ەتتى، دەپ حابارلايدى قازاقپارات.

«ورتا مەرزىمدى كەزەڭدە ءىرى جوبالار ەلدىڭ ەكونوميكالىق وسىمىنە ەلەۋلى ۇلەس قوسادى. مۇناي ءوندىرۋ كولەمى جىل سايىن وسەتىن بولادى جانە 2025 -جىلعا قاراي بۇل كورسەتكىش جىلدىق ماندە 104 ميلليون توننادان اسادى»، - دەدى مينيستر.

ونىڭ ايتۋىنشا، مۇناي ءوندىرۋ سەكتورىندا تەڭىز، قاراشىعاناق جانە قاشاعان مۇنايگاز جوبالارى ءوسىم درايۆەرى بولىپ قالۋدا. 2017 -جىلى قاشاعاندى وندىرىستىك يگەرۋ دەڭگەيى باستالعالى، ەلىمىزدە مۇناي ءوندىرۋ 2016 -جىلداعى 78 ميلليون توننادان 86,2 ميلليون تونناعا دەيىن ءوستى.

«ونىڭ ىشىندە قاشاعاندا وتكەن جىلى 8,3 ميلليون توننا مۇناي ءوندىرىلدى. وسى ارقىلى ءونىم ءوندىرۋدىڭ جىلدىق دەڭگەيى جاڭا مەجەگە كوتەرىلدى»، - دەپ اتاپ ءوتتى بوزىمبايەۆ.

بەلگىلى بولعانداي، بيىلعى ءتورت ايدا مۇناي ءوندىرۋ كولەمى ەلىمىزدە 30 ميلليون تونناعا جەتىپ، بىلتىرعى سايكەس كەزەڭگە قاراعاندا 6 پايىزعا ءوستى.

«اعىمداعى جىلى مۇناي ءوندىرۋ 87 ميلليون توننا دەڭگەيىندە قالىپتاسادى دەپ كۇتىلۋدە. بۇل ءبىزدىڭ الدىن الا بولجامىمىز. دەگەنمەندە، اتالعان كورسەتكىش ءبىرشاما ارتىقتاۋ بولادى دەگەن ويدامىز»، - دەدى ول.