قازاقستاندا قانشا قىرعىز ميگرانتى بار

استانا. قازاقپارات - قىرعىز ازاماتتارىنىڭ 20 پايىزعا جۋىعى ءناپاقاسىن شەتەلدە تاۋىپ ءجۇر. بۇل تۋرالى بۇگىن «ورتالىق ازيا ەلدەرىندەگى الەۋمەتتىك ەڭبەك قاتىناستارى: تالداۋ جانە كەلەشەگى» اتتى دوڭگەلەك ۇستەل وتىرىسىندا قىرعىزستان كاسىپوداقتار فەدەراتسياسى ءتوراعاسىنىڭ ورىنباسارى جەەنبەك وسماناليەۆ ايتتى، دەپ حابارلايدى قازاقپارات.

«بۇگىندە قىرعىزستان حالقى 6 ميلليون 300 مىڭ ادامدى قۇرايدى. كورشى ەلدەرمەن سالىستىرعاندا، سانىمىز كوپ ەمەس. ەكونوميكالىق بەلسەندى 2,5 ميلليون ادام بار. ونىڭ 2,3 ميلليونى جۇمىس ىستەيدى. وكىنىشكە وراي، بۇل ەسكى سيفر بولىپ تۇر. 2,3 ميلليون ادامنىڭ 72 پايىزى بەيرەسمي سەكتوردا جۇمىس ىستەيدى»، - دەدى ول.

ونىڭ اتاپ وتۋىنشە، قىرعىز حالقىنىڭ بەلگىلى ءبىر بولىگى ەڭبەك ميگرانتتارىنىڭ شەتەلدەن اۋداراتىن اقشا قاراجاتتارىنىڭ ەسەبىنەن كۇنىن كورىپ وتىر.

«رەسمي دەرەكتەرگە سايكەس، ازاماتتارىمىزدىڭ شامامەن ءبىر ميلليونعا جۋىعى ەڭبەك ميگرانتى. ولاردىڭ شامامەن 600 مىڭى رەسەيدە، 113 مىڭى قازاقستاندا، 30 مىڭ تۇركيادا جۇمىس ىستەيدى»، - دەدى جەەنبەك وسموناليەۆ.