قازاقشا ءان سالاتىن جاپون ءانشىسى استاناعا كەلدى

استانا. قازاقپارات - سەمەي پوليگونىنىڭ قۇرباندارىنا ارنالعان «زامان-اي» ءانىن ورىندايتىن حيروسيما ءانشىسى ميچيدا ريوككو استاناعا كەلدى، دەپ حابارلايدى قازاقپارات ءتىلشىسى.

جاپوندىق ءانشى استاناعا ق ر مادەنيەت جانە سپورت مينيسترلىگىنىڭ شاقىرتۋىمەن مادەنيەت پەن ونەر سالاسى قىزمەتكەرلەرىنىڭ I «رۋحاني قازىنا» فەستيۆالىنە كەلگەن.

ءاننىڭ ءسوزىن  ۇلىقبەك ەسداۋلەت، ال اۋەنىن - تولەگەن مۇحامەتجانوۆ جازعان. بۇل تۋىندىنى 2016 -جىلدىڭ قاراشا ايىندا قازاقستان پرەزيدەنتى نۇرسۇلتان نازاربايەۆتىڭ جاپونياعا رەسمي ساپارىندا حيروسيمالىق بالالار شىرقاعان ەدى.

«1999 -جىلى حيروسيما قالاسىندا يادرولىق سىناق قۇرباندارىنا مەديتسينالىق كومەك كورسەتۋ ءۇشىن «حيروسيما- سەمەي» ۇيىمى قۇرىلعان بولاتىن. بۇل ۇيىم جىل سايىن ستۋدەنتتەردى تاعىلىمداماعا شاقىرادى. سول قازاقستاندىق ستۋدەنتتەر ارقىلى ۇيىم باسشىلىعى سەمەيدەگى پوليگون قۇرباندارىنا ارنالعان «زامان-اي» ءانىن ەستىگەن جانە جۇرەككە جەتكەن اسەرلى ءاندى جاپون تىلىنە اۋدارۋدى ۇيعارعان. 2016 -جىلى بۇل ءاندى بالالارمەن قازاقستان پرەزيدەنتىنە شىرقاپ بەردىك. پرەزيدەنت ريزا بولىپ، ءار بالانىڭ قولىن الىپ، العىسىن ءبىلدىردى»، - دەيدى ميچيدا ريوككو.

ءانشى مۇنداي ءاندى ورىنداۋدىڭ ۇلكەن مارتەبە ەكەنىن جانە قازاقستانعا العاش رەت كەلىپ وتىرعانىن جەتكىزدى.

«استاناعا ءوز قىزىممەن كەلدىم. ەلگە دەگەن قۇرمەت بەلگىسى رەتىندە تىرناعىما قازاقستان تۋىن سالدىردىم. جاپونيا قالالارىمەن سالىستىرعاندا استانانىڭ جەرى كەڭ. حالىقتارى دا بىزگە ۇقسايدى، قوس حالىق اراسىندا ۇقساستىقتار كوپ» - دەيدى جاپوندىق ءانشى.

ايتا كەتەيىك، استانادا مادەنيەت پەن ونەر سالاسى قىزمەتكەرلەرىنىڭ ءبىرىنشى «رۋحاني قازىنا» فەستيۆالى باستالدى. ءۇش كۇنگە جوسپارلانعان شارا اياسىندا پلەنارلىق وتىرىستار، شەبەرلىك سساباقتارى مەن پىكىرتالاس الاڭدارى ۇيىمداستىرىلىپ، مەملەكەتتىك مۋزەيلەر مەن مەملەكەتتىك كىتاپحانالار اراسىنداعى رەسپۋبليكالىق «رۋحاني قازىنا - 2018» بايقاۋىنىڭ ناتيجەسى جاريالانادى.