ۇلت ۇستازى احمەت بايتۇرسىن ۇلىنىڭ كىندىك قانى تامعان ءۇي جوندەلەدى
بۇل تۋرالى «قازاقپارات» ح ا ا «ەگەمەن قازاقستان» گازەتىنە سىلتەمە جاساپ حابارلايدى.
گازەتتىڭ جازۋىنشا، قوستاناي وبلىسىندا 29 كيەلى جەر بەلگىلەنىپ، ولاردىڭ كارتاسى جاسالعان بولاتىن. وسى قاسيەتتى ورىنداردىڭ 10 ى جالپىۇلتتىق، قالعان 19 ى جەرگىلىكتى ماڭىزعا يە. رەسپۋبليكا ماقتانىشىنا اينالعان ساكرالدى ورىندارعا قوستاناي وبلىسىندا تورعاي گەوگليفتەرى، قامىستى مەكەنى، ەكىدىڭ ءدىني ەسكەرتكىشى، باراق، جاۋكە، ىبىراي التىنسارين، ءمىرجاقىپ، ابدىعاپار حان، كەيكى باتىر كەسەنەلەرى، سونىمەن قاتار امانگەلدى باتىر جەرلەنگەن ورىن جاتادى.
«بيىل وبلىس وڭىرىندەگى بارلىق كيەلى ورىندار كوركەيتىلەدى، سونىڭ ىشىندە ايىرىقشا جوندەۋدى قاجەت ەتەتىن ۇلت ۇستازى احمەت بايتۇرسىن ۇلىنىڭ جانگەلدين اۋدانىنداعى تۋعان ءۇيى، باراق باتىر كەسەنەسى جانە قوستاناي قالاسىنداعى سۆياتو-نيكولسكي شىركەۋى نازارعا الىنىپ وتىر. ولار كۇردەلى جوندەۋدەن وتەدى. احمەت بايتۇرسىن ۇلى تۋعان ءۇيدى وسىدان بىرنەشە جىل بۇرىن الدىمەن ارقالىق قالاسىنداعى ەلەنا تسۆەنتۋح باسقاراتىن «جاس ۇلان» بالالار مەن جاسوسپىرىمدەر ورتالىعى ۇيىمداستىرعان تاريحي- تانىمدىق ەكسپەديتسيا احاڭ تۋعان ءوڭىردىڭ تاريحىن، ونىڭ كىندىك قانى تامعان ءۇيدىڭ تاعدىر-تالايىن جاقسى بىلەتىن اقساقالداردى ەرتىپ بارىپ، قۇلاپ قالعان تامنىڭ ىرگەتاسىنان كەسەگىن الىپ، بەلگىلەپ، كەيىننەن ونى قالپىنا كەلتىرۋ تۋرالى باستاما دا كوتەرگەن بولاتىن. ءبىرشاما ۋاقىت وتكەن سوڭ احاڭ ۇرپاقتارى تۇراتىن اقكول-قاراسۋ اۋىلىنىڭ جاستارى اسارلاتىپ، قۇلاپ، ىرگەتاسىنىڭ ورنى عانا قالعان عيماراتتىڭ قابىرعاسىن قايتا تۇرعىزدى. ءبىراق قام كەسەكتەن سالىنعان ءۇي ۋاقىت كوشىنە شىداماي، توزىپ بارادى. ەندى، مىنە، «رۋحاني جاڭعىرۋ» باعدارلاماسىنىڭ اياسىندا ءۇيدىڭ تولىق كۇردەلى جوندەۋدەن وتەتىنى تۋرالى جاقسى حابار جۇرتتىڭ كوڭىلىنە قۋانىش ۇيالاتتى. ول تورعاي وڭىرىنە اياق باسقانداردىڭ بارىپ كورەتىن، كەمەڭگەر ادام كىندىگىنىڭ قانى تامعان جەرگە تاعزىم جاسايتىن ورىنعا اينالاتىن بولادى» دەلىنگەن ماقالادا.