اتىراۋلىق مۋاي-تايشىلار مەكسيكادا وتكەن الەم چەمپيوناتىنان جۇلدەلى ورالدى
بۇل الەمدىك دودادا قازاقستان ۇلتتىق قۇراماسى ساپىندا ءۇش اتىراۋلىق سپورتشى ەل نامىسىن قورعادى، دەپ حابارلايدى قازاقپارات ءتىلشىسى.
اتىراۋ وبلىسى دەنە شىنىقتىرۋ جانە سپورت باسقارماسىنىڭ باسپا ءسوز حاتشىسى ءىلياس شايحيەۆتىڭ ايتۋىنشا، جالپى الەم چەمپيوناتىندا قازاقستان قۇراماسى 1 كۇمىس جانە 6 قولا مەدالعا يە بولدى. ونىڭ 1 كۇمىسى مەن 1 قولاسىن اتىراۋلىق سپورتشىلار يەلەنىپ وتىر.
51 كەلى سالماقتا ەلامان ساياساتوۆ اقتىق سىنعا دەيىن جەتىپ، كۇمىس جۇلدەگەر اتاندى. فينالدا ەلاماننىڭ قارسىلاسى تايلاندتىق سپورتشى بولدى. قوس قارسىلاستىڭ بۇل ءتورتىنشى كەزدەسۋى، ولار بارلىق الەمدىك دودالاردىڭ اقتىق سىنىندا جولىعىپ كەلە جاتقانىن ايتا كەتۋ كەرەك.
60 كەلىدە يشان گاليەۆ قولا جۇلدەگە يە بولدى. ول وسى سالماقتا چەمپيون اتانعان رەسەيلىك سپورتشىدان جارتىلاي فينالدا ۇتىلعان بولاتىن.
ايتا كەتەلىك، سپورتشىلارىمىز 2017 -جىلى مينسكىدە جانە 2016 شۆەتسيادا وتكەن الەمدىك دودادا وسى ناتيجەنى كورسەتكەن بولاتىن.
