سانكت-پەتەربۋرگتە نۇرسۇلتان نازاربايەۆتىڭ تاۋەلسىزدىك جايلى كىتابى تانىستىرىلدى

استانا. قازاقپارات - سانكت- پەتەربۋرگ مەملەكەتتىك ۋنيۆەرسيتەتىندە قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ «تاۋەلسىزدىك ءداۋىرى» كىتابىنىڭ تانىستىرىلىمى ءوتتى، دەپ حابارلادى ق ر تۇڭعىش پرەزيدەنتى - ەلباسى قورىنىڭ باسپا ءسوز قىزمەتى.

شاراعا ق ر كونستيتۋتسيالىق كەڭەسىنىڭ ءتوراعاسى قايرات ءمامي، ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى ي. روگوۆ، ق ر ادىلەت ءمينيسترىنىڭ ورىنباسارى ە. ءازىموۆا، سانكت-پەتەربۋرگ مەملەكەتتىك ۋنيۆەرسيتەتىنىڭ رەكتورى ن. كروپاچەۆ جانە قالاداعى مادەنيەت جانە ونەر قايراتكەرلەرى قاتىستى.

ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ كەزدەسۋدە كىتاپتىڭ قازاقستاننىڭ تۇراقتى دامۋىنداعى ءجۇرىپ وتكەن جولىن كورسەتەتىنىن اتاپ ءوتتى. ونىڭ پىكىرىنشە، بۇل باسىلىم - ءوسىپ كەلە جاتقان ۇرپاققا وتكەننەن ساباق الىپ، جاڭا جەتىستىكتەرگە جەتۋىنە كومەكتەسەتىن تاپتىرماس قۇرال.

سونىمەن بىرگە، سانكت- پەتەربۋرگ مەملەكەتتىك ۋنيۆەرسيتەتىندە «استانا - ۇلى دالا مارجانى» تاقىرىبىندا فوتوكورمە قويىلدى. وندا كەلۋشىلەر نازارىنا قازاقستان استاناسىنىڭ 60 بىرەگەي فوتوسۋرەتى قويىلدى.

سونداي-اق، يگور روگوۆ III پەتەربۋرگتىك حالىقارالىق قۇقىقتىق فورۋمىنا قاتىسىپ، «زاماناۋي ۋربانيستيكانى قۇقىقتىق رەتتەۋ: ىقتيمال الەۋمەتتىك قاتەرلەر مەن مەگاپوليستەر ءوسىمىنىڭ كەلەشەگى» تاقىرىبىندا ءسوز سويلەدى.

يگور روگوۆ فورۋم قاتىسۋشىلارىنا قازاقستاننىڭ استاناسىن اۋىستىرۋى، ونىڭ ەكونوميكالىق، عىلىمي جانە مادەني الەۋەتىن دامىتۋ جانە 20 جىلدىق مەرەيتويعا ارنالعان شارالار تۋرالى اڭگىمەلەپ بەردى.