امەريكادان ەكى عارىشكەر ايەل بايقوڭىرعا كەلدى
2018 -جىلدىڭ 19 -مامىرىندا «سويۋز مس-09» ترانسپورتتىق باسقارىلاتىن كەمەنىڭ نەگىزگى جانە قوسالقى ەكيپاجدارىنىڭ عارىشكەرلەرى مەن استروناۆتارى بايقوڭىرعا كەلىپ، عارىش ايلاعىنداعى جاتتىعۋلارعا كىرىستى.
عارىش ايلاعى مەن كاسىپورىندار باسشىلىعى «كرايني» اۋەجايىندا سويۋز مس-09» ت ب ك نەگىزگى ەكيپاجىن - رەسەيلىك عارىشكەر سەرگەي پروكوپيەۆتى، گەرمانيالىق الەكساندر گەرستتى جانە امەريكالىق سەرينا اۋنەن - چەنسەللوردى جانە دۋبلەرلەرى - رەسەيلىك ولەگ كونەنكو، امەريكالىق ەنن ماكلەين جانە كانادالىق داۆيد سەن- جاكتى كۇتىپ الدى.
ەكى اپتادان استام ۋاقىت بويى ولار بايقوڭىردىڭ 17 الاڭىنداعى عارىشكەرلەردى دايىنداۋ ورتالىعىندا ۇشۋعا دايىندالادى.
روسكوسموس باسپا ءسوز قىزمەتىنىڭ حابارلاۋىنشا، مامانداردىڭ باقىلاۋىندا عارىشكەرلەر مەن استروناۆتار «سوكول» سكافاندرىن كيىپ كورەدى جانە عارىش كەمەسىنىڭ ىشىندە سكافاندرمەن جۇمىس ىستەپ كورەدى.
«سويۋز مس-09» ترانسپورتتىق باسقارىلاتىن كەمەسى 2018 -جىلدىڭ 6 -ماۋسىمىندا 17 ساعات 12 مينۋتتا بايقوڭىر عارىش ايلاعىنىڭ №1 -الاڭقايىنان («گاگارينسكي ستارت») ۇشىرىلادى.
