سولتۇستىك قازاقستاننىڭ اكىمى قۇمار اقساقالوۆ سامال ەسلياموۆانىڭ تۋىستارىن قۇتتىقتادى
وڭىرلىك كوممۋنيكاتسيالار قىزمەتىنىڭ حابارلاۋىنشا، وبلىس اكىمى قۇتتىقتاۋىندا سامال ەسلياموۆا بۇكىل رەسپۋبليكامەن قوسا سولتۇستىك قازاقستان وبلىسىنىڭ دا ابىرويىن اسىرعانىن ايتقان.
«ءوز اتىمنان جانە بۇكىل سولتۇستىك قازاقستاندىقتاردىڭ اتىنان سىزدەردى جانە سامالدى وسىناۋ ماڭىزدى جەڭىسىمەن قۇتتىقتايمىن! جەرلەسىمىزدىڭ تاماشا سومداعان ءرولى الەمدەگى ەڭ بەدەلدى كينوفەستيۆالداردىڭ ءبىرىنىڭ قازىلار القاسىن تامساندىردى. سامال قۇت دارىعان سولتۇستىك قازاقستان جەرىندە شىعارماشىلىق يەسى رەتىندە ءوسىپ-ءوندى. ول وسىندا تۋىپ- ءوستى، تاربيەلەندى، مەكتەپتە، ونەر كوللەدجىندە وقىدى، تەاتردا وينادى»، - دەدى قۇمار اقساقالوۆ.
ءوڭىر باسشىسى بۇگىن وتاندىق كينويندۋستريا جوعارى قارقىنمەن دامىپ كەلە جاتقانىن تىلگە تيەك ەتىپ، بۇل رەتتە سامال سىندى تالانت يەلەرىنىڭ ەڭبەگى مول ەكەنىن ايتتى.
ەسكە سالا كەتەيىك، رەسەيلىك رەجيسسەر سەرگەي دۆورسەۆويدىڭ «ايكا» اتتى كارتيناسىندا باستى ءرولدى سومداعان قازاقستاندىق اكتريسا سامال ەسلياموۆا 71- كانن كينوفەستيۆالىندە ءوز اتالىمى بويىنشا ۇزدىك دەپ تانىلعان بولاتىن.