كانن فەستيۆالى جەڭىمپازىنىڭ اپكەسى: سامال بۇل سىيلىققا لايىقتى

پەتروپاۆل. قازاقپارات - بۇگىن تاڭەرتەڭمەن سامال ەسلياموۆانىڭ تۋىستارىنا جان-جاقتان قۇتتىقتاۋلار كەلىپ جاتىر، دەپ حابارلايدى قازاقپارات ءتىلشىسى.

ەسلياموۆتار وتباسىندا تەلەفونعا تىنىم بولماي جاتىر. اكتريسانىڭ اناسى گۇلمايرا اپاي مەن اكەسى ءىلياس اعاي قۇتتىقتاۋلاردان تولقىپ، ءتىپتى كوزىنە جاس الدى.

اكتريسا سولتۇستىك قازاقستان وبلىسىنىڭ اققايىڭ اۋدانىنداعى ارالاعاش اۋىلىندا تۋعان. جۋرناليست بولۋدى ارماندايتىن ونى تاعدىر باسقا ارنامەن الىپ كەتتى. سول جىلى ونەر كوللەدجىنىڭ «قازاق تەاترىنىڭ اكتەرى» كۋرسىنا ستۋدەنتتەر قابىلدانا باستاعان. سامال وعان العاشقىلاردىڭ قاتارىندا ءتۇستى. ءبىراق ديپلومىن ونىڭ ورنىنا اپكەسى اياگوز الدى. ويتكەنى جاس دارىن يەسى ول كەزدە سەرگەي دۆورسەۆويدىڭ «قىزعالداق» («تيۋلپان») اتتى كارتيناسىنا تۇسۋگە اتتانىپ كەتكەن بولاتىن.

«ول ۇنەمى شيراق جۇرەتىن، ءارى قاتال، ءارى مەيىرىمدى بولدى. كاستينگتە ودان قانداي ءرولدى سومداعىڭ كەلەدى دەپ سۇراعاندارعا: «ەڭ باستى ءرولدى!» دەپ جاۋاپ بەرەدى. بىرنەشە كۇننەن كەيىن ونى الماتىعا شاقىرىپ، رولگە بەكىتتى. كەيىن سامال رەسەي تەاتر ونەرى اكادەمياسىنا وقۋعا قابىلداندى. كوپ ۇزاماي سەرگەي دۆورسەۆوي ونى «ايكا» فيلمىندە ءرول سومداۋعا شاقىردى. فيلمنىڭ ءتۇسىرىلىمى ۇزاققا سوزىلدى. بىلەمىن، ول ابدەن شارشاعانىنا قاراماستان ەڭبەك ەتە بەردى»، - دەيدى گۇلمايرا ەسلياموۆا.

 

سامالدىڭ اپكەسى اياگوز ساتينا سامالمەن WhatsApp ارقىلى حابارلاستى.

«سامال «مەن سەنەر- سەنبەسىمدى بىلمەي تۇرمىن!» دەپ جازدى. وسى عانا. شارشاعان، ارينە، تولقىپ تۇر. سامال بۇل جەتىستىككە ءوز ەڭبەگىمەن جەتتى. مەن ءۇشىن ونىڭ باقىتتى، دەنى ساۋ بولعانى ماڭىزدى. ءبىز ونى تاعاتسىزدانا كۇتىپ وتىرمىز»، - دەيدى اكتريسانىڭ اپكەسى.

2004 -جىلدان بەرى سامال ماسكەۋدە تۇرىپ جاتىر، ءبىراق اتا-اناسىنا ءجيى كەلىپ تۇرادى. ەندى اتى الەمگە ايگىلى اكتريسانى ونىڭ اكەسى مەن شەشەسى جاز ايىندا كەلەدى دەپ كۇتىپ وتىر.

ايتا كەتەيىك، قازاقستاندىق اكتريسا سامال ەسلياموۆا 71-كانن فەستيۆالىندە سەرگەي دۆورەسكيدىڭ «ايكا» فيلمىندە ەڭ ۇزدىك ايەل ءرولىن جەڭىپ الدى.