كانن فەستيۆالىندە جۇلدە العان سامال ەسلياموۆا جايىندا نە بىلەمىز
وسىعان وراي قازاقپارات ءتىلشىسى اكتريسا جايىنداعى مالىمەتتەردى ىزدەستىردى.
ينتەرنەتتەگى اشىق مالىمەتتەرگە سايكەس، سامال 1984 -جىلدىڭ 1 -قىركۇيەگىندە پەتروپاۆل قالاسىندا دۇنيەگە كەلگەن. رەسەيدىڭ تەاتر جانە ونەر ينستيتۋتىنىڭ اكتەرلىك فاكۋلتەتىن بىتىرگەن ول بۇعان دەيىن قازاقستان، گەرمانيا، رەسەي جانە شۆەيتساريا بىرلەسىپ تۇسىرگەن «تيۋلپان» فيلمىندە باستى ءرولدى سومداعان. بۇل تۋىندى 2008 -جىلى كانندا «ەرەكشە كوزقاراس» كونكۋرسىنىڭ باس جۇلدەسىن، جاس ءادىلقازىلاردىڭ جۇلدەسىن، فرانسيانىڭ ءبىلىم مينيسترلىگىنىڭ جۇلدەسىن جەڭىپ العان ەدى.
ال كانن فەستيۆالىنىڭ ۇزدىك اكتريساسى اتانۋىنا جول اشقان «ايكا» ءفيلمىن قازاقستان تۋماسى رەسەيلىك رەجيسسەر سەرگەي دۆورسيەۆوي تۇسىرگەن. بۇل دا قازاقستان، گەرمانيا، قىتاي، پولشا جانە رەسەي بىرىگىپ تۇسىرگەن تۋىندى. «ايكا» اتاۋى ونىڭ باستى كەيىپكەرىنىڭ ەسىمىمەن بايلانىستى قويىلعان الەۋمەتتىك دراما. تۋىندى قىرعىزستاننان ماسكەۋگە زاڭسىز كەلىپ، تۇرىپ جاتقان ميگرانت قىزدىڭ ءومىرىن سۋرەتتەيدى.
فەستيۆال لاۋرەاتتارىن ماراپاتتاۋ راسىمىنەن سوڭ ب ا ق وكىلدەرىنىڭ ءتۇسىرىلىم ءجۇرىپ جاتقاندا تۋىندى ءسىزدى ماراپاتقا جەتكىزەدى دەگەن وي بولدى ما دەگەن ساۋالىنا جاۋاپ بەرگەن سامال ەسلياموۆا: «كارتينا ءتۇسىرىلىپ جاتقاندا ونىڭ رەجيسسەردىڭ ويلاعانىنداي بولۋى نەمەسە ءبىزدىڭ كوڭىلىمىزدەن شىعۋى ماڭىزدى، ارينە. بۇل ءبىزدىڭ باستى ماقساتىمىز بولاتىن، جانە وسى ماقسات ءبىزدى الدىعا جەتەلەپ وتىردى»، - دەپ جاۋاپ بەردى ول.