قازاق جاستارىنىڭ جالىندى جەتەكشىسى عاني مۇراتبايەۆتىڭ ءجۇز جىل بۇرىنعى كىلەمى ساقتالعان

قازالى. قازاقپارات - قازالى قالاسىنداعى عاني مۇراتبايەۆتىڭ مەموريالدىق مۋزەيىندە ءجۇز جىل بۇرىنعى كىلەم ساقتالعان، دەپ حابارلايدى قازاقپارات ءتىلشىسى.

شىعىس جاستارىنىڭ جالىندى جەتەكشىسى، كورنەكتى قوعام قايراتكەرى عاني مۇراتبايەۆ اتىنداعى مەموريالدىق مۋزەيدە ەلەڭ ەتكىزەتىن ەرەكشە ەكسپوناتتار بار. سولاردىڭ ءبىرى - 1924 -جىلى عاني مۇراتبايەۆ شاڭىراق كوتەرگەندە قازالى جاستارىنىڭ سىيعا بەرگەن كىلەمى.

مۋزەيدىڭ عىلىمي قىزمەتكەرى التىناي جادىراسىنوۆانىڭ ايتۋىنشا، قۇندى جادىگەردى 1981 -جىلى عانيدىڭ جارى باقىتجان قۇرمانبايەۆادان سول كەزدەگى مۋزەي ديرەكتورى قاتيرا تايپاقوۆا الىپ كەلگەن.

«1979 -جىلدان وبلىستىق تاريحي-ولكەتانۋ مۋزەيىنىڭ فيليالى بولىپ جۇمىس ىستەگەن عاني مۋزەيى 1981 -جىلى ءوز الدىنا وتاۋ قۇردى. عانيدىڭ 100 جىلدىق مەرەيتويى كەزىندە ماسكەۋ قالاسىنداعى ۆاگانكوۆ زيراتىنداعى قابىرىنەن توپىراق اكەلىنىپ، مۋزەي ەكسپوزيتسياسىنا قويىلدى. مۋزەيدە ونىڭ ءومىرى مەن ەڭبەگى جايلى ەستەلىكتەر مەن زەرتتەۋلەر، كىتاپتار جانە باسقا دا جادىگەرلەر ساقتالعان. سونىمەن قاتار، بىزدە عاني مۇراتبايەۆتىڭ وتاۋ قۇرعان كەزدە پايدالانعان كىلەمى بار. 1981 -جىلعا دەيىن جارى - باقىتجان اپانىڭ ۇيىندە جايىلىپ تۇرعان. كىلەم قىزىل ءتۇستى. قارا، قىزىل، سارى ءتۇستى گەومەتريالىق ورنەكتەرمەن بەزەندىرىلگەن. ءجۇز جىلعا جۋىق تاريحى بار كىلەم مۋزەي تورىندە تۇر»، - دەيدى ا. جادىراسىنوۆا.

ايتا كەتەيىك، مۋزەي جاس جەتكىنشەكتى عاني رۋحىندا تاربيەلەۋگە، ونىڭ جالىندى ءومىرى مەن قوعامدىق قىزمەتىن ناسيحاتتاۋ ماقساتىندا جۇمىس جۇرگىزۋدە. جىل سايىن عانيدىڭ تۋعان كۇنىندە «ماڭگىلىك شىرقار جىرىمسىڭ» اتتى ءداستۇرلى جاس اقىندار ءمۇشايراسى مەن كىشى فۋتبول جارىسى ۇيىمداستىرىلادى. مۋزەي جانىندا «جاس عانيتانۋشىلار» ۇيىرمەسى جۇمىس ىستەيدى.

سونىمەن قاتار، ەكسپوناتتار مەن مۋزەيگە كەلۋشىلەر سانى جىل سايىن وسۋدە. مۋزەي العاش اشىلعاندا 200 جادىگەر، 3 زال بولسا، 2015 -جىلدىڭ 1 -قاڭتارىندا مۋزەي قورى 6624 جادىگەرگە جەتتى.