اتى اڭىزعا اينالعان فۋتبولشى بۋففون قوشتاسۋ حاتىن جازدى

استانا. قازاقپارات - اتى اڭىزعا اينالعان يتاليالىق فۋتبولشى، تۋريننىڭ «يۋۆەنتۋس» كومانداسىنىڭ قاقپاشىسى دجانلۋيدجي بۋففون ينستاگرامداعى پاراقشاسىندا جانكۇيەرلەرگە ارنالعان قوشتاسۋ حاتىن جاريالادى، دەپ حابارلايدى قازاقپارات ءتىلشىسى.

«التى مىڭ ءبىر ءجۇز ون ءبىر كۇن.

التى مىڭ ءبىر ءجۇز ون ءبىر كۇنگە سوزىلعان ناعىز ىستىق سەزىم. قۋانىش، كوز جاسى، جەڭىلىس جانە جەڭىس سەزىمى.

راحمەت.

راحمەت اربىرىڭىزگە.

ويتكەنى، مەنىڭ اق-قارا تۇسپەن وتكىزگەن ءومىرىمنىڭ ءار ءساتىن ەرەكشە ەتۋگە ءارقايسىڭىز كومەكتەستىڭىزدەر. وسى تۇستەر ۇستىمدەگى تەرىمە، ەكىنشى تەرىمە اينالدى. ونى ۇستىمنەن تاستامادىم، ءسۇيدىم، ارداقتادىم. مەن ونى قورعادىم، ول مەنى قورعادى. مەن ونى جان- تانىممەن قورعادىم.

ەرتەڭ - وسى جولدىڭ اقىرى. ءبىز بىرگە جازعان كىتاپتىڭ سوڭعى بەتتەرى بۇل. كەۋدەمدى كەرنەگەن قۋاتتى سەزىم تولعاندىرىپ بارادى.

جاڭا جول باستالادى. جاڭا كىتاپ. جاڭا ومىرگە قادام باسۋ قاجەت. بۇل «يۋۆەنتۋس» ءۇشىن قاجەت. ول كەز كەلگەن فۋتبولشىدان دا ماڭىزدى! ول ءوز كىتابىنىڭ جاڭا بەتتەرىن جازا بەرمەك. مەن ول كىتاپتىڭ سوڭى جوق ەكەنىنە سەنەمىن. ويتكەنى «يۋۆەنتۋستىڭ» تامىرىندا بىرەگەي، تەڭدەسسىز، عالامات كوماندانىڭ قانى اعۋدا. «يۋۆەنتۋس» - مەرەيلى وتباسى. ول - مەنىڭ وتباسىم. ونى ء«وز ءۇيىم» دەپ اتاۋدان شارشامايمىن. ويتكەنى ول ماعان بارىن بەردى. ونىڭ بەرگەنى مەنىڭ ەڭبەگىمنەن الدەقايدا مول بولدى.

جاڭا جولدىڭ باستالارى حاق. جاڭا كىتاپ. ول باستالۋى ءتيىس. مەن بولاشاققا جاڭاشا كوزبەن قاراۋعا ءتيىسپىن. مەن ءومىردىڭ «ويىننان تىس» قالۋدى قالامايتىن ادامدارعا جاسايتىن جاڭا ۇسىنىستارىن قابىلدايمىن...»، - دەپ جازدى فۋتبولشى.

40 جاستاعى فۋتبولشى كەشە «ۆەروناعا» قارسى «يۋۆەنتۋس» ساپىنداعى سوڭعى كەزدەسۋىن وتكىزدى. ول «پارمادان» تۋريندىك كلۋبقا 2001 -جىلى اۋىسقان. ۇلتتىق قۇراماداعى كارەراسىن بىلتىر قاراشادا اياقتادى.