بولاشاق مەيىربيكە اقتوبەنىڭ ەڭ سۇلۋ ارۋى اتاندى
بۇگىن اقتوبەنىڭ ەڭ سۇلۋ ارۋى تاڭدالدى. قۇدايبەرگەن جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ ستۋدەنتتەر سارايىنا وبلىستاعى ورتا ارناۋلى، جوعارى وقۋ ورىندارىنىڭ ستۋدەنتتەرى جينالدى. جانكۇيەرلەر توبى ارنايى دايىندالىپ، ۇكىلەپ قوسقان ارۋىنا قولداۋ ءبىلدىردى.
ۇيىمداستىرۋشى «San Bell» كومپانياسىنىڭ حابارلاۋىنشا، سايىستا قىزداردىڭ سۇلۋلىعى، تالانتى مەن شەبەرلىگى باعالاندى. فوتوسەسسيا ءۇش كيىم ۇلگىسىندە ءوتتى. ارۋلار قوبىلاندى باتىر اتىنداعى ورتالىق ستاديوندا بولىپ، «اقتوبە» فۋتبول كلۋبىنىڭ كيىم ۇلگىسىن جارنامالادى. ال كونكۋرس كەزىندە اقتوبەنىڭ ارۋلارى الدىمەن اق ءتۇستى كيىممەن، كەيىن كلاسسيكالىق ۇلگىدەگى كيىممەن جانە كەشكى كويلەكپەن ساحنادا ءجۇرىپ ءوتتى. ءارى قىزىقتى سۇراقتارعا جاۋاپ بەردى. ساحنادا ارۋلار وزدەرىنىڭ باستى قارسىلاسىن، وزىنە ۇنايتىن ءتۇسىن، سۇلۋلىق كۇتىمىن، تىلەگىن ايتىپ بەردى.
ايتا كەتەيىك، ءۇش ساعاتقا سوزىلعان بايقاۋ كەزىندە «ميسس اقتوبە - 2018» بايقاۋىندا «ميسس اقتوبە ۆيرتۋال» نوميناتسياسىن سىمباتى مەن سۇلۋلىعى جاراسقان ديليارا ومىرسەرىكوۆا جەڭىپ الدى. «ميسس اقتوبە - 2018» بايقاۋىنىڭ ءۇشىنشى ورنى اسىلاي باعلانوۆاعا، ەكىنشى ورىنى بانۋ قوسايەۆا، ءبىرىنشى ورىنى اسەمگۇل قۇلماعامبەتوۆاعا بۇيىردى. ال باس جۇلدەنى اقتوبە مەديتسينالىق كوللەدجىنىڭ 3 كۋرس ستۋدەنتى ەلميرا قالباي جەڭىپ الدى.
«مەن ءوزىمنىڭ جەڭىمپاز ەكەنىمدى ءالى دە سەزىنە الماي وتىرمىن. سەبەبى، دايىندىق كەزىندە سۇلۋ دا اقىلدى قىزداردىڭ ءارقايسىسى اقتوبە ارۋى بولۋعا لايىقتى ەكەنىن ءبىلدىم. الدىمەن جانىمداعى قۇربىلارىم، انام قۇتتىقتادى. جاڭا مۇمكىندىك سىيلاعانى ءۇشىن ۇيىمداستىرۋشىلارعا العىس ايتامىن. الداعى ۋاقىتتا قازاقستان ارۋى بايقاۋىنا قاتىسىپ، اقتوبە نامىسىن لايىقتى قورعايمىن دەپ ويلايمىن»، - دەدى اقتوبەنىڭ ەڭ سۇلۋ ارۋى ەلميرا قالباي «قازاقپارات» تىلشىسىنە بەرگەن سۇحباتىندا.
«ميسس اقتوبە - 2018» بايقاۋىنىڭ جەڭىمپازى كوللەدجدى اياقتاعان سوڭ جوعارى وقۋ ورنىنا ءتۇسۋدى ارماندايدى. ول ءوز ماماندىعىن جاقسى كورەدى.
«مەديتسينا ادام ومىرىمەن تىعىز بايلانىستى. جاۋاپكەرشىلىگى جوعارى ماماندىقتى ءوز قالاۋىممەن تاڭدادىم. الداعى ۋاقىتتا وسى سالانىڭ بىلىكتى مامانى بولعىم كەلەدى»، - دەدى ەلميرا قالباي.