15:11, 19 - مامىر 2018 | GMT +6
اۋعانستانداعى ستاديوندا قاتارىنان ءۇش جارىلىس بولدى
استانا. قازاقپارات - اۋعانستاننىڭ شىعىسىندا ورنالاسقان نانگارحار پروۆينتسياسىنىڭ دجالالاباد قالاسىنداعى ستاديوندا قاتارىنان ءۇش رەت جارىلىس بولىپ، كەم دەگەندە سەگىز ادامنىڭ ءومىرىن قيدى.
بۇل جايلى اقپاراتتى جەرگىلىكتى رەسمي تۇلعالار راستادى دەپ حابارلايدى قازاقپارات.
TOLOnews تىڭ حابارلاۋىنشا، پروۆينتسيا گۋبەرناتورى اتتاۋللا حودجاني جارىلىستار ستاديونعا كريكەت ماتچىن تاماشالاۋعا كورەرمەندەر جينالعان ساتتە بولعانىن مالىمدەگەن.
ونىڭ ايتۋىنشا، جارىلىستاردىڭ سالدارىنان 45 ادام جارالانعان.
قازا تاپقاندار اراسىندا تۋرنيردىڭ ۇيىمداستىرۋشىسى حەداياتۋللا زاحير مەن لاگمان پروۆينتسياسىنداعى مەحتارلام قالاسى ءمەرىنىڭ ورىنباسارى دوكتور نيكمال دا بار ەكەنى تۋرالى حابار تاراعان.
قاسيەتتى رامازان ايىنىڭ باستالۋىنا وراي ماتچتا جەرگىلىكتى كوماندالار ويناپ جاتقان.
«تاليبان» قوزعالىسى دجالالاباد قالاسىندا بولعان وسى جارىلىستارعا قاتىسى جوق ەكەنىن ايتىپ وتىر.