بالىق - جۇرەك جۇمىسىن جاقسارتادى
«ءبىز بۇرىننان ومەگا-3 مايلى قىشقىلدارى بالىقتا بولاتىنىن بىلەمىز، ول جۇرەك جۇمىسىنا وتە پايدالى. ءبىز جۇرگىزگەن جاڭا زەرتتەۋلەر ونى راستاپ وتىر جانە زياندى تاماقتاردىڭ، ونىڭ ىشىندە مايلى تاماقتىڭ ورنىنا بالىق كوبىرەك جەيتىن بولسا ناتيجە جاقسىراق بولاتىنىن كورسەتۋدە» ، - دەدى گارۆارد ۋنيۆەرسيتەتىنىڭ مامانى ەريك ريمم. بۇگىندە كوپتەگەن عالىمداردىڭ ەسەپتەۋىنشە، ديەتا مەن ازىق- تۇلىكتىڭ جەكەلەنگەن تۇرلەرى ادامنىڭ سالماعىنا عانا ەمەس، سونىمەن قاتار، مي، جۇرەك، قانتامىرلارى جانە دەنەسىنىڭ نەگىزگى مۇشەلەرىنىڭ جاعدايىنا اسەر ەتەدى. مىسالى، جاقىندا عانا عالىمدار ءزايتۇن مايى مەن جەرورتالىق تەڭىز تاماقتارىن كوپتەپ تۇتىنۋ ينسۋلتتان جانە ينفاركتتان ءولۋ قاۋپىن تومەندەتەتىنىن انىقتادى. ال، تاماقتا تۇزدىڭ شامادان كوپ بولۋى جۇرەك پەن قان تامىرلارىنىڭ جۇمىسىن ناشارلاتادى. تەڭىز ونىمدەرى، بالىق مايى مەن ونىڭ قۇرامىنداعى شەكتەلمەگەن مايلى قىشقىلدار باياعىدان جۇرەك پەن قان تامىرلارىنىڭ جۇمىسىنا پايدالى دەپ ەسەپتەلىنەدى. سەبەبى ولار قان قىسىمى مەن اعزاداعى حولەستەرين كولەمىن تومەندەتىپ، قان تامىرلارىن نىعايتادى. الايدا تەڭىز ونىمدەرى ەتىنىڭ قۇرامىندا سىناپ پەن وزگە دە زياندى زاتتار كوپ كەزدەسەدى. ال ولار ادامنىڭ وزگە ومىرلىك اسپەكتىلەرىنە كەرى اسەرىن تيگىزىپ جاتادى. وسى رەتتە، ريمم جانە ونىڭ ارىپتەستەرى تەڭىز ونىمدەرىن تۇتىنۋعا بايلانىستى وڭ جانە تەرىس تۇستاردى ساراپتاپ، الەمنىڭ تۇكپىر- تۇكپىرىنەن عىلىمي توپتاردىڭ سوڭعى 10 جىلداعى اتالعان سالاداعى زەرتتەۋلەرىن تالداپ شىقتى.
مەديتسينا ماماندارى انىقتاعانداي، اپتاسىنا 2 رەت بالىق جەگەن جاعدايدا جۇرەكتىڭ يشەميالىق اۋرۋى، ينفاركت، ينسۋلت جانە قان تامىرلارىنىڭ اۋرۋى %40-50 عا تومەندەيدى. ءدال وسىنداي ناتيجەگە تازا بالىق مايىن تۇتىنا وتىرىپ قولجەتكىزۋگە بولادى. سونىمەن قاتار، دارىگەرلەر اكۋلا، تۋنەتس پەن وزگە دە ءىرى بالىقتاردىڭ ەتىنەن باس تارتۋعا كەڭەس بەرەدى. سەبەبى ولاردىڭ اعزالارىندا سىناپ تەز جينالادى. فينليانديا حالقىنىڭ دەنساۋلىعىنا جۇرگىزىلگەن زەرتتەۋ ناتيجەلەرى كورسەتىپ وتىرعانداي، سىناپ ومەگا-3 قىشقىلىن تولىعىمەن باسىپ تاستاماسا دا تيىمدىلىگىن تومەندەتەدى.
baq.kz