بەيتانىس اۋەننىڭ اتاۋىن تاۋىپ بەرەتىن قوسىمشا قانداي قازاق اندەرىن تانيدى
ەلوردا تورىندە ءوتىپ جاتقان Global Challenges Summit 2018 فورۋمى بارىسىندا Shazam قوسىمشاسىنىڭ نەگىزىن قالاۋشى كريس بارتون اتالعان باعدارلامانىڭ تانۋ تىزىمىنە قازاق اندەرىن دە قوسۋعا دايىن ەكەندىگىن بىلدىرگەن بولاتىن، دەپ حابارلايدى قازاقپارات ءتىلشىسى.
«جالپى Shazam بۇكىل الەم مۋزىكالارىن، ماسەلەن، جاپون، كورەي، قىتاي، ءۇندى اۋەندەرىن تانۋعا دەن قويادى. ءبىز ءوزىمىزدىڭ قوسىمشامىزعا قازاقستاندىق مۋزىكانى دا زور ريزاشىلىقپەن قوسا الامىز» ، - دەگەن ەدى ول.
ءبىراق، «ءۇمىتسىز شايتان» . ءدال وسى ۇمىتپەن ءبىز Shazam قوسىمشاسىن تەلەفونعا جۇكتەپ، ءبىرقاتار قازاق ءانشىسىن تەكسەرىپ كورگەن ەدىك. ناتيجە قۋانتارلىق. قوسىمشادا قازاق اندەرىن رەسمي تانۋ قىزمەتى ەنگىزىلمەسە دە، ەلىمىزدىڭ ءبىرقاتار ەسترادا جۇلدىزىن ءدوپ باسىپ تاني الاتىندىعىنا كوز جەتكىزدىك. ماسەلەن، قوسىمشا روزا رىمبايەۆانىڭ ورىنداۋىنداعى « ءاليا» ، قاراقات ءابىلدينانىڭ «ارۋ عۇمىر» ، «اسىل اجە» ، ەرنار ايداردىڭ «كۇنىم سەن سونبەشى» ، «جاراي ما» ، تورەعالي ءتورالىنىڭ « ءبىرتۇرلى قىز» ، ەركە ەسماحانمەن بىرگە ايتاتىن «اللو» ، ەركەنىڭ «قايدا؟ » ، بەيبىت قورعاننىڭ «وت، وت جانارىڭ» ، قايرات نۇرتاستىڭ «جارالى جاننىڭ ءانى بۇل» ، «الماتى ءتۇنى» ، مۇزارتتىڭ «ول كوكتەم ورالمايدى» ، ايقىننىڭ «پاح- پاح» ، بۇركىت پەن ايشانىڭ «مەكەنىم قازاقستان» ، Ayree Aray دىڭ «قيناما مەنى» اندەرىن بىردەن ءدال تابا الدى.
مۇنان بولەك، ديماش قۇدايبەرگەننىڭ دە ورىنداۋىنداعى اندەردى ءدوپ باستى.
وكىنىشتىسى، ديماشتىڭ قازاقشا ورىنداۋىنداعى اندەرىن انىقتاۋعا كەلگەندە قوسىمشا قاۋقارسىزدىق تانىتادى. تەك قىتايدىڭ I am a Sınger حالىقارالىق جوباسىندا ورىندالعان شەتەلدىك اندەرىن بىردەن كورسەتىپ بەردى. قوسىمشا « ۇلىتاۋ» قازاقستاندىق اسپاپتى ەتنو- روك ستيلىندەگى مۋزىكالىق ۇجىمىنىڭ «جۇمىر قىلىش» ، «اداي» ، «ياپىر- اي» ، «تەرىسقاقپاي» سىندى كۇي كومپوزيتسيالارىن دا انىقتاي الادى.