استانادا تۇڭعىش رەت ترياتلوننان الەم كۋبوگى ءوتىپ جاتىر

 استانا. قازاقپارات - استانادا ترياتلوننان الەم كۋبوگى باستالدى، دەپ حابارلايدى قازاقپارات ءتىلشىسى.

«بۇل تۋرنير قازاقستان ءۇشىن عانا ەمەس، ترياتلون سالاسىنداعى تۇتاس حالىقارالىق قوزعالىس ءۇشىن ماڭىزدى. پوستكەڭەستىك كەڭىستىكتە الەم كۋبوگى تۇڭعىش رەت ءوتىپ جاتىر. سايىستى وتكىزۋ قۇقىعىن قازاقستاننىڭ جەڭىپ الۋى دا ۇلكەن مارتەبە» ، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى الەم كۋبوگىنىڭ اشىلۋ سالتاناتىندا.

ءمينيستردىڭ ايتۋىنشا، الەم كۋبوگىن وتكىزۋ قۇقىعىن جەڭىپ الۋ وڭايعا سوققان جوق. ايتسە دە، قازاقستاننىڭ وزگە ەلدەرمەن سالىستىرعاندا ءبىرقاتار باسىمدىقتارى بولدى.

«ەڭ الدىمەن، بۇل رەسپۋبليكالىق ترياتلون فەدەراتسياسىنىڭ ەڭبەگى، سەبەبى مۇنداي ءىرى سايىستى وتكىزۋ ءۇشىن وعان بار جاعداي جاسالۋى كەرەك. قازاقستاندا ترياتلون وتە قارقىندى دامىپ كەلەدى، بۇعان دەيىن اۋەسقويلار مەن سپورتشىلار اراسىندا بىرنەشە جارىس وتكىزگەنبىز. ەكىنشىدەن - ترياتلون كۋبوگىن وتكىزۋ ءۇشىن ينفراقۇرىلىمنىڭ بولۋى جانە ءۇشىنشى ماسەلە - كوپشىلىكتىڭ قولداۋ ءبىلدىرۋى. مۇنىڭ بارلىعى شەشىم شىعارۋدا ءوز سەپتىگىن تيگىزدى» ، - دەپ اتاپ ءوتتى مينيستر.

ول قازاقستانداعى سپورت قوزعالىسىنىڭ كۇننەن- كۇنگە دامىپ كەلە جاتقانىن، ترياتلون سالاسىندا عانا ەمەس، مارافون وتكىزۋدىڭ سانگە اينالعانىن ايتتى.

سۋدىڭ تەمپەراتۋراسى ەداۋىر تومەن بولعاندىقتان، ازىرگە ايەلدەر اراسىنداعى دۋاتلون جارىسى ءوتىپ جاتىر. 15:00 دە سۋدىڭ سالقىندىعىنا قاراماستان، ەرلەر ترياتلوندا ب ا ق سىنايدى.

ايتا كەتەيىك، استانادا وتەتىن ترياتلوننان الەم كۋبوگى مامىردىڭ 19-20 - كۇندەرى وتەدى. وعان قاتىسۋعا 38 مەملەكەتتەن 140 اتلەت ءوتىنىم بەردى. سپورتشىلار ستاندارتتى قاشىقتىق بويىنشا سىنعا تۇسەدى. ياعني، 1500 مەتر - ءجۇزۋ، 40 شاقىرىم - ۆەلوكەزەڭ جانە 10 شاقىرىم - جۇگىرۋ.

سوداي- اق، بۇگىن ترياتلون پاركتە بالالار جارىسى، كونسەرتتىك جانە ويىن- ساۋىق باعدارلامالارى وتەدى.

20 - مامىر كۇنى قازاقستانداعى ترياتلون سپورتىن ناسيحاتتاۋ مەن دامىتۋ ماقساتىندا Age Group (اۋەسقويلار) اراسىنداعى سايىس وتەدى.