اقمولا وبلىسىندا «اللانىڭ پەرىشتەسى» جەرلەنگەن جەر بار
جەرگىلىكتى حالىق ونى «اۋليە بەيىتى» دەپ دە اتايدى. اقمولا وبلىستىق تاريحي- مادەني مۇرانى قورعاۋ جانە پايدالانۋ ورتالىعىنىڭ باس ينسپەكتورى سەرىك ىسقاقوۆتىڭ ايتۋىنشا، تاريحي ورىن ءوڭىردىڭ كيەلى جەرلەرى كارتاسىنا ەنىپ وتىر، دەپ حابارلايدى قازاقپارات ءتىلشىسى.
تاريحي دەرەكتەرگە قاراعاندا كەنەسارىنىڭ 48 باتىرىنىڭ ءبىرى - جەكەباتىر تەرىساققان بويىنا قىرعىزداردى الىپ كەلىپتى. قىرعىزدار كەيىن بالۋان كول مەن قاسقا كول جايلاۋىنا (قازىرگى جارقايىن اۋدانى) قونىستانعان. قىلىشباي اۋليە جەكە باتىردىڭ نەمەرە ءىنىسى. قىلىشباي اۋليە شامامەن 1846-1905 -جىلدارى ءومىر سۇرگەن. ونىڭ 5 ۇلى بولىپتى. ول كورىپكەل جانە دە وتە تۋراشىل ادام بولعان دەلىنەدى. قىلىشباي نوقى بالاسىنىڭ نەمەرەسى قوزىلدان ۇرپاق بولۋعا ءتيىستى.
قىلىشباي اۋليەنىڭ شاريعاتى قازاق حالقىنىڭ سالت- داستۇرىنە ۇيلەسىمدى بولعان، ونىڭ زامانداسى ءجۇسىپ قاجى وزگە مولدالاردى توقتاتىپ، «قىلىشبايدىڭ شاريعاتىنىڭ قالاي دا بولسا قيسىنى بار دەگەن ەكەن» .
قىلىش اتا وتە ارۋاقتى، مولدا كىسى بولعان، اۋىرعان ادامدار قوي سويىپ باسىنا تۇنەگەن. ناۋقاس، جەتىم قالعان بالالار مەن قارت ادامدارعا كومەكتەستى. ادامداردى بايلاردىڭ ادىلەتسىز شەشىمدەرىنەن قورعاعان. ادامدار ونى «اللانىڭ جىبەرگەن پەرىشتەسى» دەپ اتاعان.
بۇل تۋرالى جەرگىلىكتى ولكەتانۋشى ساقتاش السەيىتوۆ، تارعىن ماقجانوۆتىڭ ايتۋلارى بويىنشا، سول كەزدە تەرىساققان اۋلىندا 30 مولدا ءومىر سۇرگەن ەكەن، سونىڭ ىشىندە قادىرلى جانە ارداقتىسى وسى ادام بولعان. تىڭ يگەرۋ كەزىندە كوشىپ كەلگەن ورىستار قىلىشباي بەيىتىنە جاقىن جەردى جىرتا الماعان ەكەن. جەرگىلىكتى حالىقتىڭ اراسىندا مولدانىڭ جاساعان مەيرىمدىلىگى مەن ادال ەڭبەگى تۋرالى ءالى كۇنگە دەيىن ايتىلىپ كەلەدى. قازىرگى ۋاقىتتا بۇل بەيىت كيەلى جەر بولىپ سانالادى.