ەلىمىزدە قابىرگە بيىك قۇلپىتاس پەن ءزاۋلىم كەسەنە ورناتۋعا تىيىم سالىندى

  استانا. قازاقپارات - بىلتىر ق م ب د «جانازا جانە جەرلەۋ راسىمدەرى» اتتى كىتاپ شىعارىپ، وندا قايتىس بولعان ادامدى جەرلەگەندە قابىرىنە بيىك قۇلپىتاس پەن ءزاۋلىم كەسەنە ورناتۋعا تىيىم سالعان ەدى.

 بۇل جاڭاشىلدىقتاردى كوكشەتاۋلىق يمامدار مەن قوعام وكىلدەرى ءبىرىنشى بولىپ قولدادى. بۇل تۋرالى 31 ارنا حابارلايدى.

كوكشەتاۋ قالاسىنداعى زيراتتىڭ اۋماعىنان ماتەريالدارى شەت ەلدەردەن ارنايى تاپسىرىسپەن اكەلىنگەن ءتۇرلى مازاردى كورۋگە بولادى. كەي مازار ءمارماردان تۇرعىزىلعان. مۇنداي كەسەنەلەر قۇنى 10 ميلليون تەڭگە دەيىن بارادى ەكەن.

«ەگەر دە ۇلكەن مەشىت سياقتى زيراتتى الاتىن بولساق، ورتا ەسەپپەن 2-3 ميلليون تەڭگەنىڭ كولەمىندە شىعىپ قالادى» ، - دەيدى اقمولا وبلىستىق ناۋان حازىرەت مەشىتىنىڭ زيراتقا جاۋاپتى قىزمەتكەرى ەربول مىرزاتايەۆ.

بۇعان دەيىن زيراتتاى قاداعالاعان جەكە كاسىپكەر اقشا ءۇشىن ازاماتتارعا تاڭداعاە جەرىن ساتۋمەن اينالىسقان. الايدا مۇنداي جاعدايدى بولدىرماس ءۇشىن، مەشىت قىزمەتكەرلەرى ءبىر جارىم اي بۇرىن اكىمدىكتەگىلەردىڭ رۇقساتىمەن زيراتتى ءوز باقىلاۋىنا الىپتى.

«جەرلەۋ ورىنعا 2/3 شارشى مەتر الاڭ عانا بەرىلەدى. جانە دە ونى كوتەرگەن كەزدە 1 مەتر بيىكتىككە عانا كوتەرۋدى ۇسىنىپ وتىرمىز. كەلەشەكتە وسىنى حالىققا ءتۇسىندىرىپ، بىرىزدىلىككە ءتۇسىرۋ ويىمىز بار» ، - دەيدى اقمولا وبلىستىق ناۋان حازىرەت مەشىتىنىڭ باس يمامى قۋانىش ءسابيت.

 سونداي- اق، قالالىق ارداگەرلەر كەڭەسى مەن «ەل بىرلىگى» قوعامدىق بىرلەستىگى وكىلدەرىنەن قۇرالعان كوميسسيا شارتتاردىڭ ورىندالۋىن قاداعالاپ ءجۇر.

«ول جەر اكىمدىكتىڭ، ونىڭ ىشىندەگى كوممۋنالدىق بولىمدىكى. سوندىقتان، ءبىزدىڭ شارتىمىزدى ورىنداۋ كەرەك. بولماسا، باسقا جەرگە اپارىپ جەرلەسىن» ، - دەيدى كوكشەتاۋ قالالىق ارداگەرلەر كەڭەسىنىڭ ءتوراعاسى شياپ اليەۆ.

كوكشەتاۋ زيراتى تولىق قورشالماعاندىقتان، يمامدار قابىر باسىن 1 مەترگە دەيىن كوتەرۋگە رۇقسات بەرىپ وتىر. الايدا جاڭا زيرات اشىلعاننان كەيىن قابىر باسىنىڭ بيىكتىگى ءبىرشاما تومەندەيدى.

 يمامداردىڭ ايتۋىنشا، مولاعا تال وتىرعىزۋ، ونىڭ ىشىندە جەمىس اعاشىن ەگۋ -  قۇپتارلىق ءىس.