تۋريزمدى دامىتۋ: الاكول ادام تانىماستاي وزگەرەدى

 ءۇرجار. قازاقپارات - بۇگىن شىعىس قازاقستان وبلىسىنىڭ اكىمى دانيال كەنجەتاي ۇلى احمەتوۆ ءۇرجار اۋدانىنا ارنايى جۇمىس ساپارىمەن كەلىپ، الاكولدە اتقارىلعان جۇمىستار بارىسىمەن تانىستى، دەپ حابارلايدى قازاقپارات ءتىلشىسى.

وبلىس اكىمى دانيال كەنجەتاي ۇلى شىعىس قازاقستاندا ينفراقۇرىلىمدى دامىتۋعا ەرەكشە دەن قويىپ وتىر. بيىلعى جىلى الاكول جاعاسىن كوركەيتۋگە وبلىستىق بيۋدجەتتەن 817 ميلليون تەڭگە ءبولىپ، بۇگىنگى كۇنى جاعالاۋدى اباتتاندىرۋ جۇمىستارى جالعاسىن تابۋدا. سونداي- اق، قابانباي اۋىلىنداعى مادەنيەت ءۇيىنىڭ عيماراتىن قايتا جاڭعىرتۋ جۇمىستارىنا قاراجات ءبولىنىپ، وندا تاريحي- ارحەولوگيالىق مۇراجاي اشۋ باعىتىندا جۇمىستار جۇرگىزىلۋدە. ەڭ ءبىرىنشى وبلىس باسشىسى قۇرىلىس ءجۇرىپ جاتقان مادەنيەت ۇيىمەن تانىسىپ، جانە ونىڭ ىشىندە بولاتىن مۇراجاي تۋرالى ءسوز قوزعادى.

 ش ق و مادەنيەت، مۇراعاتتار جانە قۇجاتتاما باسقارماسىنىڭ باسشىسى ازامات مۋحامەدچينوۆتىڭ ايتۋىنشا مۇراجايعا 3 مىڭ ەكسپونات اكەلىنبەك. وندا «ءۇرجار حانشايىمى» ، ەكى «التىن ادام» ، تارباعاتايدىڭ تاڭبالى تاستارى، نايمانقالا، ەمىل قالاسى، شىعىستان تابىلعان ارحەولوگيالىق زاتتار جانە تاعى باسقا قۇندىلىقتار قويىلماق.

ودان ءارى ايماق باسشىسى جاڭادان اشىلعان تۋريستىك اقپارات ورتالىعىندا بولدى. مۇندا تۋريستەرگە اعىلشىن، ورىس، قازاق تىلدەرىندە قىزمەت كورسەتىلەدى. جانە ءار كەلگەن دەمالۋشىعا الاكولدەگى دەمالىس ۇيلەرى بويىنشا تولىق اقپارات الۋعا مۇمكىندىك جاسالعان. جانە ونلاين رەجيم ارقىلى دەمالىس ۇيلەرگە الدىن الا تاپسىرىس قابىلدايدى.

بۇدان كەيىن وبلىس اكىمى دانيال كەنجەتاي ۇلى ورتالىق اربات پەن جاعاجايدى كورىپ، كەرەمەت جۇمىستار اتقارىلىپ جاتقاندىعىن ءسوز ەتتى. بۇگىنگى كۇنى وندا الماتى قالاسىنان كەلگەن «ەتنو- مۇرا» ج ش س كىشى ساۋلەتتىك مۇسىندەردى قويىپ جاتىر.

ءارى قاراي دانيال كەنجەتاي ۇلى ءىس- ساپاردى قورىتىندىلاۋ ماقساتىندا دەپارتامەنت پەن وزگە دە وبلىستىق باسقارما باسشىلارىنىڭ جانە الاكولدىڭ جەكە كاسىپكەرلەرىنىڭ قاتىسۋىمەن ۇلكەن جيىن وتكىزدى. وتىرىستا ءۇرجار اۋدانىنىڭ اكىمى سەرىك زاينۋلدين جۇمىستار بارىسىن باياندادى.

 

«الاكول جاعالاۋىنا بيىلعى جىلى جالپى قۇنى 2 ميلليارد 511 ميلليون تەڭگەنىڭ جۇمىستارىن جۇرگىزۋ جوسپارلانىپ وتىر. اتاپ ايتقاندا، «ماقانشى- جالاناشكول» اۆتوكولىك جولىن ورتاشا جوندەۋ جۇمىستارىن اياقتاۋ، «قارابۇلاق- قابانباي» اۆتوكولىك جولىن (16 ك م) جوندەۋ، قابانباي اۋىلىنداعى مادەنيەت ءۇيىن (مۇراجاي) قايتا جاڭعىرتۋ جۇمىستارى، «ماقانشى» مەملەكەتتىك كوممۋنالدىق كاسىپورنىنىڭ ماتەريالدىق تەحنيكالىق بازاسىن نىعايتۋ، جىلجىمايتىن مۇلىك نىسانىن ساتىپ الۋ، كول جاعالاۋىن اباتتاندىرۋ جۇمىستارىنا قارجى قاراستىرىلىپ وتىر. ساياباقتىڭ ءىشىن جارىقتاندىرۋ ءۇشىن شامدار ورناتۋ، ۇزىندىعى 121 مەتر بولاتىن قورشاۋ جاساۋ، «ۆوركاۋت» سپورت الاڭىنا 530 ك ۆ م برۋسچاتكا توسەۋ جۇمىستارى جۇرگىزىلىپ جاتىر، 10- ماۋسىمدا تولىق اياقتالادى» ، - دەدى اۋدان اكىمى سەرىك زينابەك ۇلى.

جيىن بارىسىندا ايماق باسشىسى سەمەي مەن وسكەمەننەن جالاڭاشكول ستانساسىنا اپتاسىنا ەكى رەت پويىزدار قاتىنايتىندىعى تۋرالى جانە بيلەت باعاسى 2800 تەڭگە بولاتىنىن ايتتى. بۇل جاڭاشىلدىق ءار شىعىسقازاقستاندىققا شيپالى الاكولدە دەمالۋعا مۇمكىندىك بەرەدى.

«ءبىز تۋريستىك ينفراقۇرىلىمدى كەڭەيتۋ ءارى جاقسارتۋ ءىسىن باستى مىندەت ەتىپ وتىرمىز. ەندىگى كەزەكتە دەمالۋشىلارعا جاسالىپ جاتقان ىڭعايلى جاعدايلاردى ودان ءارى جەتىلدىرىپ، مىقتى تۋريستىك ەلدەرمەن يىق ءتۇيىستىرۋىمىز كەرەك. سەبەبى، تابيعاتتىڭ بۇل بايلىعى كەز كەلگەن ادامدى اسەرسىز قالدىرماي، ەمدىك قاسيەتتەرىمەن تانداندىرارى ايقىن» ، - دەدى وبلىس اكىمى.

 سونىمەن بىرگە دانيال كەنجەتاي ۇلى كاسىپكەرلەرگە سالىقتارىن جاسىرماي، دۇرىس تولەۋدى قاداپ ايتتى.