سيفرلاندىرۋ ءمينيستردىڭ جۇمىسىن ەمەس، حالىقتىڭ ءومىرىن جەڭىلدەتۋ كەرەك - ەستونيانىڭ تاجىريبەسى

استانا. قازاقپارات - ەستونيانىڭ ەكس- پرەزيدەنتى تووماس حەندريك يلۆەس ءوز ەلىندە سيفرلاندىرۋدىڭ قالايشا ىسكە اسقانىن ايتىپ بەردى. بۇگىندە اتالعان مەملەكەتتە ءۇش- اق قىزمەتتى الۋ ءۇشىن ادام ءوزى كەلۋى كەرەك. قالعانىن ونلاين رەجيمدە جاساۋعا بولادى، دەپ حابارلايدى قازاقپارات ءتىلشىسى.

«بىزدە شامامەن 500 قىزمەتتى ەلەكتروندى تۇردە الۋعا بولادى. سونى حالىقتىڭ 99 پروتسەنتى قولدانادى. ءۇش- اق قىزمەت ەلەكتروندى فورماتتا كىرمەيدى. بىرىنشىدەن، ادام ۇيلەنسە، يا بولماسا، تۇرمىسقا شىقسا، ءوزى كەلۋى كەرەك. ەكىنشىدەن، جەردى ساتىپ الۋعا بولمايدى. ال جىلجىمايتىن مۇلىكتى ساتىپ الۋ ءۇشىن مىندەتتى تۇردە نوتاريۋسقا كورىنۋ كەرەك. ۇشىنشىدەن، ادام اجىراسقاندا ءوزى كەلەدى. قالعان قىزمەتتەردىڭ ءبارىن ونلاين رەجيمدە الۋعا مۇمكىندىك بار»، - دەدى تووماس حەندريك يلۆەس سيفرلاندىرۋ جونىندەگى حالىقارالىق ساراپشىلاردىڭ وتىرىسىندا.

ونىڭ ايتۋىنشا، مەملەكەتتىك قىزمەتتەر ەلەكتروندى فورماتتا بولسا، جۇمىستىڭ تيىمدىلىگى ارتا تۇسەدى. بيۋروكراتيا ازايادى. مەملەكەتتىك اپپاراتتىڭ شتاتى دا قىسقارادى. بۇنىڭ بارلىعى ءبىراز قاراجاتتى ۇنەمدەۋگە مۇمكىندىك بەرەدى. «سوندا نە ىستەۋ كەرەك؟ تەحنولوگيا جاعىنان قيىندىق جوق. سەبەبى اينالانىڭ بارلىعى - تەحنولوگيا. ەڭ باستىسى، باتىل ساياسي شەشىم بولۋى قاجەت. ۇكىمەت ناقتى مىندەت قويسا عانا سيفرلاندىرۋ شارالارى اتقارىلادى. ەستونيا سولاي ىستەدى. باس كەزىندە ءبىز ارتتا بولدىق. حالىقتىڭ ءوزى سەنبەدى. ءبىراق ءبىز ەلدى سيفرلاندىرۋدى ىسكە اسىرا الدىق. ءبىز قارجى ءمينيسترىنىڭ جۇمىسىن ەمەس، حالىقتىڭ ءومىرىن جەڭىلدەتۋگە تىرىستىق. سول ارقىلى قازىرگى جەتىستىككە جەتىپ وتىرمىز»، - دەپ اتاپ كورسەتتى تووماس حەندريك يلۆەس.

 ايتا كەتەيىك، بۇگىن استانا ەكونوميكالىق فورۋمى اياسىندا سيفرلاندىرۋ جونىندەگى حالىقارالىق ساراپشىلار كەڭەسىنىڭ وتىرىسى ءوتتى. سول جەردە Amazon-نىڭ باس مەنەدجەرى توني ۆان دەن بەرگ قازاقستاندا ەلەكتروندى ساۋدا- ساتتىقتى دامىتۋ بويىنشا كەڭەس بەردى.