ەلباسى قازاق ۇلتتىق ونەر ۋنيۆەرسيتەتىنىڭ مەرەيتويىنا ارنالعان سالتاناتتى كونسەرتكە قاتىستى
مەرەكەلىك كونسەرتتە قازاق جانە شەتەل كومپوزيتورلارىنىڭ ءتۇرلى جانرداعى تانىمال تۋىندىلارى كورەرمەنگە ۇسىنىلدى. ولاردىڭ قاتارىندا كەڭەس دۇيسەكەيەۆتىڭ «ونەر ورداسى» شىعارماسى، ەۆگەني برۋسيلوۆسكييدىڭ «قىز جىبەك» وپەراسىنان ءۇزىندى، لاتيف حاميديدىڭ «بۇلبۇل» ءانى، لەونارد بەرنستايننىڭ «ۆەستسايد تاريحى» ميۋزيكلىنەن «سيمفونيالىق بيلەر» جانە باسقا دا كوپتەگەن تۋىندىلار ورىندالدى.
قازاقستان پرەزيدەنتى بارشا جۇرتتى ۋنيۆەرسيتەتتىڭ 20 جىلدىعىمەن قۇتتىقتاپ، اۋقىمدى مادەنيەت وشاقتارى ەلوردا مارتەبەسىن اسقاقتاتا تۇسەتىنىن اتاپ ءوتتى.
«شىعارماشىل زيالى قاۋىم ەلوردانىڭ مادەني ومىرىنە ەلەۋلى ۇلەس قوسىپ كەلەدى. مەن استاناعا الماتىدان جانە بۇكىل قازاقستاننان مادەنيەت سالاسىنىڭ ۇزدىك وكىلدەرىن شاقىردىم. الەمدە كوپتەگەن ۋنيۆەرسيتەت بار، ءبىراق ونەر ۋنيۆەرسيتەتى تەك استانادا عانا بوي كوتەردى. بۇگىندە ەلوردادا وپەرا جانە بالەت تەاترى، حورەوگرافيا اكادەمياسى، ورتالىق كونسەرت زالى جانە باسقا دا مادەنيەت وشاقتارى اشىلدى. وسىنىڭ ءبارى ەلىمىزدىڭ بولاشاعى ءۇشىن، مادەنيەتىمىز بەن ونەرىمىز ءۇشىن جاسالىپ جاتىر»، - دەدى نۇرسۇلتان نازاربايەۆ.
مەملەكەت باسشىسى ونەر ۋنيۆەرسيتەتىنىڭ قالىپتاسىپ، دامۋى ءۇشىن ونىڭ باسشىلىعى مەن پروفەسسور- وقىتۋشىلار قاۋىمىنىڭ زور ءرول اتقارعانىن ايتتى.
«ۋنيۆەرسيتەت جانىندا كوللەدج، باكالاۆريات، ماگيستراتۋرا جانە دوكتورانتۋرا بار. 3 مىڭعا جۋىق ستۋدەنت ءبىلىم الۋدا. 20 جىل ىشىندە ۋنيۆەرسيتەتتىڭ 500-دەن استام تۇلەگى حالىقارالىق كونكۋرستار مەن بايقاۋلاردىڭ لاۋرەاتى اتاندى. سىزدەرگە تابىس تىلەيمىن، وتانىمىز - قازاقستان رەسپۋبليكاسىنىڭ ابىرويىن اسقاقتاتاتىن اتاقتى مۋزىكانتتاردىڭ شىعۋىنا جانە جاڭا ەسىمدەردىڭ تانىلۋىنا نيەتتەستىك بىلدىرەمىن!» - دەپ تۇيىندەدى ەلباسى.
