قازاقستاننىڭ مەملەكەتتىك اپپاراتى بولاشاقتا شاعىن، ءبىراق ءتيىمدى بولادى - اسقار جۇماعاليەۆ
ونىڭ اتاپ وتۋىنشە، قازاقستاندا 700 دەن استام مەملەكەتتىك قىزمەت بار. الداعى ۋاقىتتا ونىڭ 80 پايىزىن ەلەكتروندىق نۇسقاعا كوشىرۋ جوسپارلانعان. ياعني، بۇل قىزمەتتەر ادامي فاكتورسىز ۇسىنىلاتىن بولادى.
«مەملەكەتكە جۇگىنگەن ازامات بەلگىلى ءبىر انىقتامانى قانداي دا ءبىر مەملەكەتتىك قىزمەتشىنىڭ كومەگىنسىز، سايكەس مالىمەتتەر بازاسى، اقپاراتتىق جۇيەلەر ارقىلى اۆتوماتتى تۇردە الا الادى. بۇل تۇرعىدا بۇگىندە اتالعان جۇمىستاردى جاساپ جاتىرمىز. ارينە، الداعى ۋاقىتتا ونىڭ شىنايى جۇمىس ىستەيتىندىگىن حالىققا كورسەتەتىن بولامىز»، - دەدى ۆيتسە- پرەمەر.
ۇكىمەت باسشىسى ورىنباسارىنىڭ سوزىنە قاراعاندا، بۇگىندە ازاماتتار مەن بيزنەس وكىلدەرىنە ەلەكتروندى تۇردە بەرىلەتىن مەملەكەتتىك قىزمەتتەر دە بار.
«مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىمەن مەملەكەتتىك ورگانداردى وڭتايلاندىرۋ ماسەلەسىنە كەلە جاتىرمىز. ءبىز ىقشام بولعانىمەن بارىنشا ءتيىمدى ءارى ساپالى قىزمەتتەر ۇسىناتىن مەملەكەتتىك اپپاراتقا قاراي ىلگەرىلەۋدەمىز. مەنىڭشە، بۇل مەملەكەتتىك باسقارۋدى تسيفرلاندىرۋدىڭ وتە ماڭىزدى ەلەمەنتى سياقتى»، - دەدى اسقار جۇماعاليەۆ.
اۆتور: مارلان جيەمباي