قىتايلىق ازامات ەگىز قوزى عانا تولدەيتىن تۇقىم شىعاردى

استانا. قازاقپارات -  قىتايلىق ينۆەستورلار قازاقتىڭ ەدىلباي قويىن وسىرۋگە كىرىسەدى. جوبانى شيان قالاسىنىڭ تۇرعىنى جاڭ فاڭ ەسىمدى ازامات قولعا الىپ وتىر.

 كاسىپكەر بۇل باستاماعا ازىرگە 1 جارىم ميلليون ا ق ش دوللارىن سالدى. وعان 5 قوراجاي مەن مال تولدەيتىن كەشەننىڭ قۇرىلىسىن اياقتاپ قويدى.

 تاياۋدا قازاقستاننان 5 مىڭ باس ەدىلباي قويىن الدىرماق. ودان كەيىن قازاقتىڭ قىلشىق ءجۇندى، قۇيرىقتى جانۋارى جەرگىلىكتى تۇقىمدارمەن بۋدانداستىرىلادى. قىتايلىق سەلەكسيونەرلەردىڭ بۇل سالاداعى تاجىريبەسى مول. ولار افريكا، نەمىس جانە قىتاي قويلارىن شاعىلىستىرىپ، تەك ەگىز قوزى عانا تولدەيتىن تۇقىم شىعاردى. ينۆەستور ەدىلبايدى اسىلداندىرعان سوڭ، قازاقستانداعى سەرىكتەستەرىنە قايتا جونەلتەدى. ويتكەنى مال جايىلىمدا ءوسىپ، ەكولوگيالىق تازا ءونىم بەرۋى ءتيىس. ال قازاقستاندىق شارۋالار وسىرگەن قويلارىن نارىقتاعى باعادان قىمباتقا ساتا الادى.

 جاڭ فاڭنىڭ ايتۋىنشا، تاياۋدا شيانعا جۇمىس ساپارىمەن كەلگەن ۇكىمەت باسشىسىنىڭ ورىنباسارى جانە اۋىل شارۋاشىلىعى ءمينيسترى ءومىرزاق شوكەيەۆ جوبامەن تانىسىپ، قولداۋ بولاتىنىن ايتقان.

جاڭ فاڭ، ينۆەستور:

 - جوبانى جۇزەگە اسىرۋعا ساقاداي ساي وتىرمىز. تەك سەرىكتەستەرىمىزبەن كەلىسىمشارتقا قول قويساق بولعانى. قازاقستاننىڭ ۆيتسە- پرەمەرى جانە اۋىل شارۋاشىلىعى ءمينيسترى شيانعا كەلىپ، ءبىزدىڭ ينۆەستيتسيالىق جوبامەن تانىسىپ كەتتى. سوندىقتان بۇل ىسكە جول اشىلادى دەگەن سەنىم بار. قازىر قازاقستان جاعى قويلاردى جونەلتۋگە دايىن وتىر. ال ءبىزدىڭ تاراپ ونى كىرگىزۋگە رۇقساتىن بەردى. بۇيىرتسا، قىتايدىڭ ۇلكەن نارىعىندا قازاقستاندىق قويلاردىڭ ەتىن ساتاتىن كۇن دە الىس ەمەس.

www.24.kz