بولاشاقتىڭ مەديتسيناسى قانداي بولادى - دوكتور گرەيدىڭ كوزقاراسى
«قازىر ءبىز ادامدى ەمدەۋ شارالارىنا نەگىزگى باسىمدىق بەرەمىز. ونداي مەديتسينا ارتتا قالادى. بولاشاقتىڭ مەديتسيناسى ادام اعزاسىنداعى پروتسەسستەردى قالپىنا كەلتىرۋمەن اينالىساتىن بولادى. كولىكتى قالاي جوندەسەك، بولاشاقتىڭ مەديتسيناسى دا ادامنىڭ دەنساۋلىعىن سولاي قالپىنا كەلتىرەدى. جاسۋشالاردى جاڭارتۋ، گەنەتيكالىق تەراپيا الدىڭعى قاتارعا شىعادى. ءدال وسى سالالار ادامنىڭ دەنساۋلىعىن جاقسارتىپ، ءومىرىن ايتارلىقتاي ۇزارتاتىن بولادى. ونداي وزگەرىستەردىڭ ەكونوميكالىق ەففەكتىسى وتە ۇلكەن بولادى»، - دوكتور گرەي استانا ەكونوميكالىق فورۋمىنىڭ پلەنارلىق ماجىلىسىندە.
عالىمنىڭ ايتۋىنشا، ادامنىڭ ءومىرى ۇزارسا، زەينەتكەرلىككە شىعاتىنداردى الەۋمەتتىك قامسىزداندىرۋ جانە تاعى باسقا شىعىندار كوبەيەدى. حالىقتىڭ تۇتىنۋ كولەمى دە ارتادى. ءبىراق ءدارى- دارمەككە كەتەتىن اقشانىڭ كولەمى ازايادى. سەبەبى دەنساۋلىقتى ساقتاۋدىڭ جاڭا ءادىس- تاسىلدەرى بولادى.
«بۇنىڭ بارلىعى 5-6 جىلدان كەيىن كەلۋى ابدەن مۇمكىن. ءدال قاي كەزدە بولاتىنىن ناقتى ايتۋ قيىن. ءبىراق ءبىر نارسە انىق، بولاشاقتا ادامدى جاسارتاتىن مەديتسينا بولادى. اتالعان تەراپيالار ادامزاتتىڭ ءومىرىن تۇبەگەيلى وزگەرتەدى. ادامنىڭ ءومىرى ۇزارادى. دەمەك، قازىرگى سالىق تولەۋشىلەر، جۇمىسشىلار، داۋىس بەرۋشىلەر ۇزاق جاسايدى. وسىنى ويلانۋ قاجەت. سوعان ساي جوسپارىمىزدى دا جاساۋىمىز قاجەت»، - دەپ اتاپ كورسەتتى وبري دي گرەي.
اۆتور: ارمان اسقاروۆ