بولاشاقتا شاھارلاردىڭ دەربەستىگى ارتا تۇسەدى - سينگاپۋرلىق عالىم

 استانا. قازاقپارات - بولاشاقتا شاھارلاردىڭ دەربەستىگى ارتا تۇسەدى. بۇل تۋرالى استانا ەكونوميكالىق فورۋمى بارىسىندا قالالاردىڭ دامۋى تاقىرىبىنا ارنالعان سەسسيا جۇمىسىندا سينگاپۋر مەملەكەتتىك باسقارۋ مەكتەبىنىڭ عىلىمي قىزمەتكەرى، ساياساتتانۋشى پاراگ حاننا ءمالىم ەتتى، دەپ حابارلايدى قازاقپارات ءتىلشىسى.

«2050 -جىلعا دەيىن جەر بەتىندەگى حالىق سانى 10 ميلليارد ادامعا جەتۋى مۇمكىن. وسى ورايدا قالالاردىڭ قۇرىلىسىن قالاي جۇرگىزەمىز دەگەن ساۋال تۋىندايدى. ەگەر دە قالالارعا قاراي جاپپاي كوشى- قون ۇردىسىنە قاراساق، وندا تەڭەستەرۋ، ۇيلەستىرۋ شارالارىن باستاۋعا نازار اۋدارۋ قاجەتتىگى بايقالادى. اتاپ ايتقاندا، قاي قالا دامىتىلادى، رەسۋرستاردى قايدا باعىتتايمىز، وسى قالالار قانشالىقتى جىلدام وسەدى دەگەن ماسەلەلەردى تىڭعىلىقتى پىسىقتاۋىمىز كەرەك. تاعى ءبىر ۇردىسكە توقتالساق، قالالار وزدەرىن- ءوزى باسقاراتىن بولادى، شاھارلاردىڭ اۆتونومياسى كوبىرەك بايقالادى. نەگىزى، قالالار وزدەرىندە بيلىكتىڭ كوبىرەك بولعانىن، وزدەرىنىڭ رەسۋرستارىن قاداعالاۋدا مول مۇمكىندىك الۋعا نيەتتى» ، - دەدى پ. حاننا.

ونىڭ پايىمىنشا، «اقىلدى قالا» نەمەسە «بولاشاق قالاسى» مارتەبەسىنە يە بولۋى ءۇشىن جەكە سەكتور ەلەۋلى ءرول اتقارادى. ول ءۇشىن «Google» سەكىلدى كومپانيالار كەرەك.

«قالالار زەينەتكەرلەر ءۇشىن قولجەتىمدى بولۋى ءتيىس. سوندىقتان بىزگە باعا جاعىنان قولجەتىمدى تۇرعىن ءۇي نىساندارىن قۇرىپ، وسى شاھارلاردا ادامداردىڭ جۇمىس ىستەۋى مەن ەڭبەك ونىمدىلىگىنە نازار اۋدارعان ءجون. ارينە، بۇل باعىتتا قالالاردىڭ كوپشىلىگىندە اتقارىلعان جۇمىستار ناتيجەلى بولمايتىنى انىق. دەگەنمەن دە بىزدە قالانىڭ دامۋىنداعى جاقسى تاجىريبەلەر دە از ەمەس. ماسەلەن، استانا سەكىلدى قالالار باستاپقىدا شاعىن عانا شاھار ەدى، كەيىننەن قارقىندى تۇردە وسە باستادى» ، - پاراگ حاننا.