جەڭىل اتلەتيكا: وڭتۇستىك كورەيادا ءۇش سپورتشى ەل نامىسىن قورعايدى

استانا. قازاقپارات - قازاقستاندىق سىرىقپەن سەكىرۋشى ءۇش سپورتشى وڭتۇستىك كورەيانىڭ پۋسان قالاسىندا وتەتىن ءداستۇرلى حالىقارالىق تۋرنيرگە قاتىسادى، دەپ حابارلايدى قازاقپارات ءتىلشىسى.

ق ر جەڭىل اتلەتيكا فەدەراتسياسىنىڭ باسپا ءسوز قىزمەتىنىڭ حابارلاۋىنشا، اتالعان دودادا ەلىمىزدىڭ نامىسىن بۇل جارىستا نيكيتا فيليپپوۆ، سەرگەي گريگوريەۆ جانە ميحايل بۋدا قورعايدى. تۋرنير 18-19- مامىر كۇندەرى وتەدى.

بۇل جارىسقا جىلدا الەمنىڭ ەڭ ۇزدىك سىرىقپەن سەكىرۋشىلەرى قاتىسادى. ولار ەرەسەكتەر، جاستار جانە ايەلدەر اراسىندا جۇلدەنى ساراپقا سالادى. قازاقستان اتلەتتەرى وسىعان دەيىن پۋساندا جوعارى كورسەتكىشتەرگە قول جەتكىزىپ ءجۇر. ايتالىق، 26 جاستاعى نيكيتا فيليپپوۆ بۇعان دەيىن ءۇش رەت چەمپيون اتانعان. سەرگەي گريگوريەۆ ەكى رەت توپ جارعان. ميحايل بۋدا ءبىر مارتە جاستار اراسىندا ءبىرىنشى ورىن، ءبىر رەت قولا جۇلدە ەنشىلەگەن.

وڭتۇستىك كورەياعا قازاقستان سپورتشىلارىن سەرگەي كۋليبابا باستاپ بارادى.

جارىس كەستەسىنە سايكەس جاستار الدىمەن 18- مامىردا سايىسقا تۇسەدى. اتالمىش دودا IAAF سەرتيفيكاتىنا يە بولعان.

اۆتور: كۇنسۇلتان وتارباي