باتىرحان شۇكەنوۆتىڭ ەش جەردە ورىندالماعان اندەرى جارىققا شىعادى
بۇل جايىندا ب. شۇكەنوۆ اتىنداعى "وتان - انا" اتتى Ⅱرەسپۋبليكالىق انشىلەر كونكۋرسى الدىندا وتكەن باسپا ءسوز كونفەرەنسياسىندا قور ديرەكتورى ولجاس بايكانوۆ مالىمدەدى.
ەستەرىڭىزگە سالا كەتسەك، كونكۋرس قىزىلوردا قالاسىندا وتۋدە. "وتان - انا" كونكۋرسىنا ارنالعان باسپا ءسوز كونفەرەنتسياسىنا ديلناز احماديەۆا، رينات گايسين، رۇستەم نۇرجىگىت، ساعىناي ابدۋلين جانە ەرجان ءابدراحمانوۆ قاتىستى.
- سوڭعى جىلى ءبىز باتىردىڭ جاڭا البومى بويىنشا جۇمىس جاساپ جاتىرمىز. بۇل جيناققا بۇرىن- سوڭدى ەشكىم ەستىمەگەن 13 جاڭا اۋەن ەنەدى. ال، 20 - مامىر كۇنى ماسكەۋدەن اندەر جيناقتالعان ديسك جەتكىزىلەدى. بۇل جيناققا قازاقستان عانا ەمەس، كوپتەگەن ەلدىڭ ماماندارى بىرلەسكەن ۇلكەن توپ جۇمىس جاسادى، - دەدى ولجاس بايكانوۆ.
سونىمەن قاتار، باتىرحان شۇكەنوۆپەن تىعىز ارىپتەستىك جۇمىس جاساعان كومپوزيتور رينات گايسين ءانشىنىڭ تاعى دا بىرنەشە ءانىن وڭدەپ، جاڭارتىپ شىعاراتىنىن جەتكىزدى.
- ءبىز ۇزاق ۋاقىت بىرلەسىپ جۇمىس جاسادىق. مەن باتىرعا ارناپ بىرنەشە ءان شىعاردىم. ماسەلەن، بۇگىنگى كونكۋرستا وعان ارناپ جازعان "استانا" ءانى ورىندالادى. كونكۋرس اياقتالعان سوڭ مەن پراگاعا بارىپ، ستۋديا ارحيۆىندە ساقتاۋلى باتىردىڭ بىرنەشە ءانىن جاڭارتىپ، قايتادان وڭدەيمىن. قانداي ءان ەكەنىن ازىرگە ايتپايمىن، قۇپيا بولىپ قالا بەرسىن، - دەدى رينات گايسين.
ەستەرىڭىزگە سالا كەتسەك، قىزىلوردادا 16-18 - مامىر كۇندەرى وبلىس اكىمدىگىنىڭ قولداۋىمەن ب. شۇكەنوۆ اتىنداعى "وتان - انا" اتتى Ⅱرەسپۋبليكالىق انشىلەر كونكۋرسى وتۋدە. وعان ەلىمىزدىڭ بارلىق وڭىرلەرىنەن جانە وزبەكستان مەملەكەتىنەن 25 ورىنداۋشى قاتىسۋدا.
كونكۋرس تالابى بويىنشا، قاتىسۋشىلار 2 ءان ورىندايدى، ونىڭ ءبىرى باتىرحان شۇكەنوۆتىڭ رەپەرتۋارىنان بولۋى كەرەك.
Baq.kz