قازاقستان جاھاندىق ۇمتىلىستا كوشباسى ەلگە اينالدى - پان گي مۋن

 استانا. قازاقپارات - قازاقستان جاڭارتىلاتىن ەنەرگيا كوزدەرىنە جاھاندىق ۇمتىلىستا كوشباسى ەلگە اينالدى.

 بۇل تۋرالى بۇگىن Global Challenges Summit 2018 فورۋمى اياسىندا وتكەن حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىنىڭ تۇساۋكەسەر شاراسىندا جاھاندىق جاسىل ءوسىم اسسامبلەياسىنىڭ پرەزيدەنتى پان گي مۋن (Global Green Growth Institute) ايتتى، دەپ حابارلايدى قازاقپارات ءتىلشىسى.

«بۇكىل الەمدە كوشباسشىلار تومەن كومىرسۋتەكتى ەكونوميكاعا كوشۋ ءۇشىن ءوز ەلىنىڭ ەكونوميكاسىن ترانسفورماتسيالاۋعا ۇمتىلادى. ءبىز كوپتەگەن ەل جۇزەگە اسىرعان تاماشا قادامداردى باقىلاپ وتىرمىز. جاڭارتىلاتىن ەنەرگيا كوزدەرىنىڭ ۇلەسى، «جاسىل» ەكونوميكا ۇلەسى ارتا تۇسۋدە. جەك- پەن بايلانىستى ەنەرگەتيكالىق شەشىمدەردىڭ قۇنى ءداستۇرلى جانە ەكولوگيالىق تۇرعىدا تازا ەمەس ەنەرگيا كوزدەرىمەن باسەكەلەس بولا الاتىنداي نۇكتەسىنە جەتىپ وتىر. وسى ورايدا، قازاقستان وسىناۋ جاھاندىق ۇمتىلىستا كوشباسشى ەلدەردىڭ ءبىرى بولىپ وتىرعاندىعىن ايرىقشا اتاپ وتكىم كەلەدى» ، - دەدى پان گي مۋن.

ونىڭ پايىمىنشا، قازاقستاننىڭ 2013 -جىلى ازىرلەنگەن جاس ەكونوميكاعا كوشۋ تۇجىرىمداماسى ەۋروپالىق وداق وزىنە الىپ وتىرعان باعىتتارمەن تولىقتاي ساي كەلەدى. سونىمەن قاتار، قازاقستان 2050 -جىلعا قاراي بارلىق ەلەكتر ەنەرگياسىنىڭ 50 پايىزىن بالاما ەنەرگيا كوزدەرىنەن الۋ مىندەتتەمەسىن ءوز موينىنا الىپ وتىر.

«2017 -جىلى پرەزيدەنت نۇرسۇلتان نازاربايەۆ ىسكە قوسقان جاسىل تەحنولوگيالار حالىقارالىق ورتالىعى قازاقستاننىڭ بۇكىل الەم بويىنشا بۇل مىندەتتەمەلەرگە باسشىلىق ەتۋگە مۇمكىندىك بەرەتىن جاقسى قۇرالعا اينالارىنا سەنىمدىمىن. مەنىڭشە، ءبىز قازاقستانعا بۇل باعىتتا قولداۋ كورسەتۋىمىز قاجەت» ، - دەدى ول.

سونىمەن قاتار، پان گي مۋن ءوزى باسقاراتىن جاھاندىق جاسىل ءوسىم اسسامبلەياسىنىڭ الەم ەلدەرىنىڭ ۇكىمەتتەرىنە تومەن كومىرسۋتەكتى جاسىل ءوسىم سالاسىنداعى وزىندىك ساياساتتى ازىرلەۋگە جانە ونى جۇزەگە اسىرۋعا كومەك بەرەتىندىگىن ايتتى.

«بۇل سالاداعى قازاقستاننىڭ كوشباسشىلىعىمەن ءارى بۇكىل الەمدە قولدانىلىپ جاتقان بەلسەندى شارالار ارقىلى جانە جاسىل دامۋ بويىنشا جەرگىلىكتى دەڭگەيدە شارالاردى جۇزەگە اسىرا وتىرىپ، كليماتتىڭ وزگەرۋىنە قارسى كۇرەسە الاتىندىعىمىزعا سەنىمىم مول. ادامزات ەرتەرەكتە بولىپ كەتكەن قيىندىقتاردى ەڭسەرە الۋى ءتيىس» ، - دەدى ول.