ميتيو كاكۋ روبوت ادامنان «تارتىپ الا المايتىن» ماماندىقتاردى اتادى
ونىڭ ايتۋىنشا، جاقىن كەلەشەكتە روبوتتاردان اۆتوماتيكادا جۇمىس ىستەيتىن ورتا تاپتاعى ادامدار «زارداپ شەگەدى» جانە روبوتتار زياتكەرلىك كاپيتال مەن يننوۆاتسيالىق- شىعارماشىلىق جۇمىستاردى الماستىرا المايدى.
«روبوتتار كوپتەگەن ەلەمەنتارلىق دۇنيەلەردى بىلمەيدى. ءالى كۇنگە دەيىن 5 جاسار بالانىڭ ينتەللەكتىسىن الماستىراتىن باعدارلاما جوق. ماسەلەن، الەۋمەتتىك، وتباسىلىق قارىم- قاتىناستاردان بەيحابار. ولار قاراپايىم ۇستەلدى تاني المايدى، ءتورتۇرىش پەن ءۇشبۇرىشتى سىزىپ، اۋماقتى ولشەي المايدى. جاقىن بولاشاقتا روبوتتار قوقىستى جيناپ، ماشيناعا تيەي المايدى. اۋىر جۇمىستاردى الماستىرۋى مۇمكىن، ءبىراق وعان كوپتەگەن ونجىلدىقتار كەرەك»، - دەدى ميتيو كاكۋ روبوتتاندىرۋعا ارنالعان پىكىرتالاستا.
ونىڭ ايتۋىنشا، روبوتتار ادامدارمەن قارىم- قاتىناستى تالاپ ەتەتىن پوليتسيا، كريميناليستيكا، سوت، وقىتۋشى، يننوۆاتسيالىق ماماندىقتارىندا قاۋقارسىز.
«زياتكەرلىك - روبوتتاردىڭ قولىنان كەلمەيتىن قابىلەت. ماسەلەن، روبوت مەنى - پروفەسسوردى الماستىرا الا ما؟ پروفەسسور- روبوت ستۋدەنتتىڭ قاراپايىم جوسپارىن تۇزەي المايدى. ستۋدەنتكە تىكەلەي قارىم- قاتىناس جاساي الاتىن جەتەكشى كەرەك، ادام كەرەك. پوليتسيا دا قىلمىسكەردىڭ دۇنيەتانىمىمەن جۇمىس ىستەيدى جانە بۇل روبوتتىڭ قولىنان كەلمەيدى. روبوتتار ءان جازا المايدى، جەتەكشى بولىپ، ءتيىمدى شەشىم قابىلداي المايدى. سوندىقتان، روبوتتار - ادام ومىرىندەگى كومەكشى قۇرال عانا، ال ادامدار روبوتتار الماستىرا المايتىن بىلىكتىلىگى جوعارى ماماندىقتارعا بەيىمدەلگەنى ءجون الداعى ونجىلدىقتا ەڭبەك نارىعىندا ادامي كاپيتالى ءالى كەرەك دەپ تولىق ايتا الامىز»، - دەدى م. كاكۋ.
ايتا كەتەيىك، XI استانا ەكونوميكالىق فورۋمى ەلوردادا 17-19 - مامىر كۇندەرى وتەدى. بۇعان دەيىنگى فورۋمداردا جاھاندىق ەكونوميكا، سيفرلاندىرۋ جانە تاعى باسقا ماسەلەلەر قارالسا، بيىلعى فورۋم كەزىندە رەسۋرستار، روبوتيزاتسيا، ادامزاتتىڭ وزگەرۋى، اگروونەركاسىپ سالاسىنداعى جەتىستىكتەر، دەنساۋلىق سالاسىنىڭ ماسەلەلەرى تالقىعا سالىنادى.
فورۋمنىڭ العاشقى ەكى كۇنى جاھاندىق ماسەلەلەرگە ارنالادى، ءۇشىنشى كۇنى سپيكەرلەر ق ر ۇكىمەتىنىڭ، ساراپشىلار قوعامداستىعىنىڭ وكىلدەرىمەن التى باعىت بويىنشا جۇمىس جۇرگىزەدى.
اۆتور: ايجان سەرىكجان قىزى