قازاقستان پرەزيدەنتى پان گي مۋنمەن كەزدەستى
استانا ەكونوميكالىق فورۋمى اياسىندا وتكەن كەزدەسۋ بارىسىندا نۇرسۇلتان نازاربايەۆ پان گي مۋننىڭ بىرىككەن ۇلتتار ۇيىمىن دامىتۋعا زور ۇلەس قوسقانىن اتاپ ءوتتى.
«ءسىز قازاقستاندا بىرنەشە رەت بولدىڭىز. ءبىز يادرولىق قارۋسىزدانۋ باعدارلاماسى بويىنشا بىرلەسە جۇمىس ىستەدىك. 29 - تامىز بۇكىل الەمدە يادرولىق سىناقتارعا قارسى ءىس- قيمىل كۇنى رەتىندە اتاپ وتىلەدى. سىزبەن جانە كورەيا رەسپۋبليكاسىمەن ارامىزدا وتە جاقسى دوستىق قارىم- قاتىناس قالىپتاستى» ، - دەدى مەملەكەت باسشىسى.
پان گي مۋن استانا ەكونوميكالىق فورۋمى جاھاندىق سىن- تەگەۋرىندەردى تالقىلاپ، ولاردى ەڭسەرۋ جولدارىن تابۋ ىسىندە ماڭىزدى ءرول اتقاراتىنىن ايتتى.
«مەن قازاقستانعا جاڭا قىزمەتىمدە العاش رەت كەلىپ وتىرعانىما قۋانىشتىمىن. جاھاندىق كوپتەگەن پروبلەمالار بار، مەن ولاردى شەشۋگە قولداۋ كورسەتۋگە ءازىرمىن. استانا ەكونوميكالىق فورۋمى تەك قازىرگى وزەكتى تاقىرىپتاردى عانا ەمەس، سونداي- اق جاھاندىق دامۋدىڭ كەلەشەكتەگى ماسەلەلەرىن دە تالقىلاۋعا ارنالعان الاڭعا اينالىپ وتىر» ، - دەدى بواو ازيا فورۋمى كەڭەسىنىڭ ءتوراعاسى.
اڭگىمەلەسۋ بارىسىندا تاراپتار ب و ا و ازيا فورۋمى مەن استانا ەكونوميكالىق فورۋمى اراسىنداعى ىنتىماقتاستىق ماسەلەلەرىن، سونداي- اق «جاسىل» تەحنولوگيالاردى دامىتۋ سالاسىندا، عىلىمي- يننوۆاتسيا سەكتورى مەن ءبىلىم بەرۋ ىسىندە بايلانىستار ورناتۋدىڭ پەرسپەكتيۆالارىن تالقىلادى.