ادام اعزالارىن ساتاتىن دۇكەندەر اشىلادى - ميتيو كاكۋ
بۇل تۋرالى بۇگىن Global Challenges Summit 2018 فورۋمىنىڭ جالپى وتىرىسىندا «مۇمكىنسىزدىكتەر تەورياسى» بەستسەللەرىنىڭ اۆتورى ميتيو كاكۋ ايتتى، دەپ حابارلايدى قازاقپارات ءتىلشىسى.
«وتكەن كۇنى كەشكىسىن امەريكالىق تەلەارنانى كورىپ وتىرىپ، عالامشاردا ەشقانداي دا ينتەللەكتۋالدى ءومىر جوق دەگەن قورىتىندىعا كەلدىم. ءبىراق، تاياۋ 30-100 جىلعا بارىنشا ۇمىتپەن قارايمىن جانە نەلىكتەن ەكەنىن دە تۇسىندىرە كەتەيىن. كەلەسى 30 جىلدا كومپيۋتەرلىك چيپ ءبىر تيىننان دا ارزان بولادى. كومپيۋتەرلىك بيلىك ەلەكتر ەنەرگياسى سياقتى بارلىق جەردە بولادى. ءىس جۇزىندە «كومپيۋتەر» ءسوزى اعىلشىن تىلىنەن جويىلادى» ، - دەدى ول.
ونىڭ اتاپ وتۋىنشە، الداعى 30 جىلدا كومپيۋتەرلىك چيپتاردىڭ كومەگىمەن ءتىپتى كوزگە تاعاتىن لينزا ارقىلى دا ينتەرنەتكە قوسىلۋعا مۇمكىندىك تۋىندايدى.
«مۇنداي كوزگە تاعاتىن لينزانى ەڭ ءبىرىنشى كىمدەر ساتىپ الادى؟ سوڭعى ەمتيحان تاپسىراتىن ستۋدەنتتەر ساتىپ الادى. ولار كوزىن اشقان كەزدە لينزادان وزىنە قويىلعان سۇراقتىڭ بارلىق جاۋابىن كورەدى. ادامدار لينزادان وزگە ادامداردىڭ ايتقان سوزدەرىنىڭ اۋدارماسىن كورەدى. ءسىزدىڭ لينزاڭىز كەز كەلگەن ءتىلدى اۋدارىپ بەرەتىن بولادى» ، - دەدى ميتيو كاكۋ.
ونىڭ سوزىنە قاراعاندا، مەديتسينا سالاسىندا دا چيپتەر جاپپاي ەنگىزىلەدى. چيپتار تەگىن بولادى. ادام ءومىرى دە ۇزارا ءتۇسىپ، دەنە مۇشەلەرى ساتىلاتىن دۇكەندەر اشىلادى. ادامدار دەنە مۇشەلەرىن الماستىرۋعا قول جەتكىزەدى.
« ءبىز قازىردىڭ وزىندە جاساندى تەرى، كوز، مۇرىن جاساپ جاتىرمىز. كەلەسى عاسىردا بارلىق مۇشەلەر زەرتحانادا وسىرىلەدى. كەلەسى مۇشە ءبىزدىڭ باۋىرىمىز بولادى. ادامنىڭ باۋىرى بولاشاققا زەرتحانالاردا وسىرىلە باستايدى» ، - دەدى ول.
اۆتور: مارلان جيەمباي