نۇرسۇلتان نازاربايەۆ الەمدە مۇلدە جاڭا فورماتسيا قالىپتاسىپ كەلە جاتقانىن اتاپ ءوتتى
بۇل تۋرالى قازاقستان پرەزيدەنتى نۇرسۇلتان نازاربايەۆ Global Challenges Summit 2018 فورۋمىندا ءمالىم ەتتى، دەپ حابارلايدى قازاقپارات ءتىلشىسى.
«2007-2008-جىلداردان باستالعان ۇلكەن داعدارىستى، باسقاسى باسقا، ءدال دامۋدىڭ داعدارىسى دەپ ايتۋعا بولادى. وسى جەردە كورسەتىلگەن فيلمدە ادامزاتتىڭ دامۋىنىڭ 5 فورماتسياسى (قوعام دامۋىنىڭ بەلگىلى ءبىر كەزەڭى - اۆت.) تۋرالى ايتىلدى. ولاردىڭ سوڭعىلارى - كاپيتاليزم، بەسىنشىسى - سوتسياليزم. ەگەر دۇرىستاپ قارايتىن بولساق، ساراپشىلار دا ايتىپ جاتقانداي ولاردىڭ ءبارى دە شارىقتاۋ شەگىنە جاقىنداپ كەلەدى. ءبىز ونى كورىپ تە، تىڭداپ تا وتىرمىز»، - دەدى پرەزيدەنت.
نۇرسۇلتان نازاربايەۆتىڭ ايتۋىنشا، الەمدە قازىر مۇلدە جاڭا فورماتسيا قالىپتاسىپ كەلەدى.
«الدىڭعى فورماتسيالاردىڭ ءبارى دە قانتوگىستەر مەن سوعىستار ارقىلى كەلدى. ال شىنتۋايتىنا كەلگەندە سول سوعىستار بۇگىن دە - تاياۋ شىعىستا، ءارتۇرلى ەلدەردە، سيريادا، سولتۇستىك افريكادا، يراكتا بولىپ جاتقان جوق پا؟ دەمەك، Global بازاسىندا دايىندالىپ، بۇكىل الەمدىك بىرلەستىكتەر تالقىلاعاننان كەيىن ورتاق شەشىم تابۋعا ءبىز كاتاكليزمسىز قول جەتكىزە الامىز»، - دەدى پرەزيدەنت.
ەسكە سالا كەتسەك، بۇگىن ەلوردادا قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن Global Challenges Summit 2018 فورۋمىنىڭ جالپى وتىرىسى باستالدى. XI استانا ەكونوميكالىق فورۋمى ەلوردادا 17-19- مامىر كۇندەرى وتەدى.
اۆتور: ايان بەكەن ۇلى