ق ر پرەزيدەنتى: ۇزاق ءومىر ءسۇرۋ يندۋسترياسى الەمدىك ەكونوميكانىڭ ماڭىزدى بولىگىنە اينالدى

استانا. قازاقپارات - بۇگىندە ۇزاق ءومىر ءسۇرۋ يندۋسترياسى الەمدىك ەكونوميكانىڭ ماڭىزدى بولىگىنە اينالىپ وتىر.

بۇل تۋرالى بۇگىن Global Challenges Summit 2018 فورۋمىنىڭ جالپى وتىرىسىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«عالامشار تۇرعىندارى سانى جىلدام ءوسىپ كەلەدى. سوڭعى ونجىلدىقتاعى عىلىمي-تەحنيكالىق پروگرەستىڭ جەتىستىكتەرى ادام ءومىرىنىڭ ورتاشا ۇزاقتىعىن ايتارلىقتاي ۇلعايتا ءتۇستى. سوڭعى 70 جىلدا ول 23 جىلعا، 48 دەن 71 جاسقا دەيىن ءوستى. قازاقستاندا بۇل كورسەتكىش تەك تاۋەلسىزدىك جىلدارىنىڭ ىشىندە عانا 65 تەن 72,5 جاسقا دەيىن ۇلعايدى»، - دەدى نۇرسۇلتان نازاربايەۆ.

مەملەكەت باسشىسى ۇزاق ءومىر ءسۇرۋ يندۋسترياسى بۇگىندە الەمدىك ەكونوميكانىڭ ماڭىزدى بولىگىنە اينالىپ وتىرعاندىعىن باسا ايتتى.

«دەگەنمەن، جىلدام دەموگرافيالىق وزگەرىستەر بۇل ماسەلەگە جاناما كوپتەگەن شەشىمدەردى شەشۋدى تالاپ ەتەدى. عاسىر ورتاسىندا 10 ميلليارد تۇرعىندى تاماقپەن قامتاماسىز ەتۋ ءۇشىن بۇگىنگى كۇننەن 60 پايىزعا كوپ ازىق-تۇلىك وندىرۋگە تۋرا كەلەدى. بازالىق رەسۋرستاردىڭ شەكتەۋلىگىن، اسىرەسە تۇششى سۋ تاپشىلىعىنىڭ ارتا ءتۇسۋىن ەسكەرەر بولساق، بۇل وڭاي مىندەت ەمەس»، - دەدى ەلباسى.

قازاقستان پرەزيدەنتىنىڭ اتاپ وتۋىنشە، اۋىل شارۋاشىلىعى سالاسى ەڭ جوعارى تەحنولوگيالىق سالاعا اينالۋى قاجەت. سوندىقتان دا ەلىمىز زاماناۋي تەحنولوگيالاردى پايدالانۋ ارقىلى اگروونەركاسىپ كەشەنىندەگى ءوسىمدى 2 ەسەگە ۇلعايتۋ مىندەتىن ءوز الدىنا قويىپ وتىر.

«تاعى ءبىر سىن-تەگەۋرىن تۇرعىنداردىڭ قارتايۋىمەن بايلانىستى زەينەتاقى، الەۋمەتتىك قامسىزداندىرۋ جۇيەلەرىن تۇبەگەيلى قايتا قۇرۋ قاجەتتىگىندە. ولار دەموگرافيالىق شىندىققا ساي بولۋى ءتيىس»، - دەدى نۇرسۇلتان نازاربايەۆ.

اۆتور: مارلان جيەمباي