بۋرابايدا تۋريزم ماۋسىمىنىڭ اشىلۋىنا دايىندىق جۇرگىزىلۋدە

كوكشەتاۋ. قازاقپارات - اقمولا وبلىسىنىڭ اكىمى مالىك مىرزاليننىڭ توراعالىعىمەن بۋراباي كۋرورتىنىڭ جازعى ماۋسىمعا دايىندىعى پىسىقتالعان ءماجىلىس ءوتتى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.

وبلىستىق باسقارمالار مەن ۆەدومستۆولاردىڭ باسشىلارى، «بۋراباي» ۇلتتىق پاركى مەن تۋريستىك بيزنەس وكىلدەرى قاتىسقان جيىندا الدىمەن بۋراباي اۋدانىنىڭ اكىمى قانات قاراۋىلوۆتىڭ ەسەبى تىڭدالدى. ونىڭ ايتۋىنشا، كۋرورتتى وڭىردە جىلدان جىلعا تۋريستىك ينفراقۇرىلىمداردىڭ سانى ارتىپ كەلەدى. ماسەلەن، اعىمداعى جىلدىڭ باسىنان بەرى 70 ادامعا ارنالعان «ارحەي» ساۋىقتىرۋ كەشەنى قولدانىسقا بەرىلدى. سونداي-اق، 100 ورىندىق قوناق ءۇي كەشەنى، وتەل، مادەني-تۇرمىستىق جانە كوڭىل كوتەرۋ نىساندارىنىڭ قۇرىلىسى اياقتالۋعا جاقىن. بۇدان بولەك، 14 گەكتار اۋماققا الەۋمەتتىك-مادەني، سپورتتىق-ساۋىقتىرۋ، ساۋدا-ويىن ساۋىق، قوناق ءۇي ءتارىزدى تۋريستىك نىساندار سالۋ جوسپاردا بار.

 سونىمەن قاتار، «بۋراباي دامۋ» ج ش س ءبىرىڭعاي بايلانىس ورتالىعىنىڭ باسشىسى ازامات بايمۇقانوۆ پەن «ەسىل» الەۋمەتتىك كاسىپكەرلىك كورپوراتسياسى» ۇلتتىق كومپانياسىنىڭ باسشىسى قازبەك ەسكەندىروۆتىڭ باياندامالارى تىڭدالدى.

جيىندى قورىتىندىلاعان ايماق باسشىسى جازعى ماۋسىمدى اشۋدا تۋريستىك نىسانداردىڭ دايىندىعىن تولىق قامتاماسىز ەتۋدە جاۋاپتى تۇلعالارعا ناقتى تاپسىرمالار بەردى. وعان قوسا، ءى ءى د مەن ت ج د سۋعا شومىلۋ كەزىندە قاۋىپسىزدىك شارالارىمەن قامتاماسىز ەتۋدى جۇكتەدى.

وسى كۇنى مالىك مىرزالين «رۋحاني جاڭعىرۋ» باعدارلاماسى بويىنشا اشىلعان بۋراباي كەنتىنىڭ تاريحي مۇرجايى مەن «جايلاۋ» ەتنو اۋىلىن ارالاپ كوردى.