استاناداعى نۇرلى جول ۆوكزالىندا كاپسۋلا قوناقۇي اشىلدى
«كاپسۋلالىق وتەل - دەمالۋ مەن ۇيىقتاۋ ءۇشىن وتە ىڭعايلى ءارى قىمبات ەمەس. ول بيۋدجەتىن ۇنەمدەگەن تۋريست ءۇشىن دە، ىسكەري ادامعا دا ءتيىمدى. قوناقۇي بولمەسىنىڭ باعاسى ەكى مىڭ تەڭگەدەن بەس مىڭ تەڭگەگە دەيىن جەتەدى. اقشاسى وندا قانشا ۋاقىت قالۋىڭا بايلانىستى» ، - دەدى جوبانىڭ نەگىزىن قالايشى جىبەك ءادىلباقىت قىزى.
كاپسۋلالىق بولمەدە 3 ساعات بولۋ ءۇشىن 2 مىڭ تەڭگە، 6 ساعاتقا 3 مىڭ تەڭگە، 12 ساعاتقا 4 مىڭ تەڭگە جانە 24 ساعاتقا 5 مىڭ تەڭگە تولەۋ كەرەك. 7 جاسقا دەيىنگى ءبىر بالانى تەگىن كىرگىزۋگە بولادى. قوناقۇي ەكى اۋماققا - ايەلدەر جانە ەرلەرگە ارنالعان بولىپ بولىنگەن. وندا ءبىر ادامدىق 10 بولمە بار.
ءار بولمەنىڭ اۋدانى - 3 شارشى مەتر. ەنى - 1,3 مەتر، ۇزىندىعى - 2,26 مەتر.
قوناقۇيدە ۆەنتيلياتسيا، كليمات باقىلاۋ، جارىقتاندىرۋ، Smart TV، جوعارى جىلدامدىقتاعى ينتەرنەت بار. ادامنىڭ كوڭىل كۇيىنە قاراپ، جارىقتى رەتتەۋگە بولادى جانە كەلۋشىلەردىڭ زاتىن قاۋىپسىز ساقتاۋ ءۇشىن سەيفتەر قاراستىرىلعان.