پاۆلودار كاسىپكەرلەرى كۇننەن قۋات الىپ، قاراڭعىدا جارىق شاشاتىن پليتا وندىرەدى

پاۆلودار. قازاقپارات - پاۆلودارلىق كاسىپكەرلەر تالعات جۇماتايەۆ پەن قايرات تىلەۋلەن كۇندىز كۇننەن قۋات الاتىن پليتا ارقىلى لاندشافت ديزاينى سالاسىندا نوۋ-حاۋ ەنگىزۋدى قولعا الدى.

بۇل تۋرالى وبلىستىق كاسىپكەرلەر پالاتاسىنىڭ باسپا ءسوز حاتشىسى دينا ءابىلدينوۆا ايتتى، دەپ حابارلايدى pavlodarnews.kz.

«جۇماتايەۆ» جەكە كاسىپكەرلىگى پالاتاعا بيزنەس-يدەياسىمەن جۇگىنگەن بولاتىن. مەنەدجەرلەر مەن كەڭەس بەرۋشى ماماندار بيزنەس-جوسپار قۇرىپ، جوبانى جۇزەگە اسىرۋدىڭ بارلىق كەزەڭىندە كومەك كورسەتتى. ناتيجەسىندە «بيزنەس- مەكتەپ» كۋرسىنان ءبىلىم العان ول گرانتتى قارجىلاندىرۋعا ۇمىتكەر رەتىندە قاتىسىپ، ءوز جوباسىمەن جەڭىمپاز اتاندى، دەيدى دينا ءابىلدينوۆا. ساراپشىلاردىڭ پىكىرىنە سۇيەنسەك، مۇنداي پليتانىڭ قاسيەتى 200 جىلعا دەيىن ساقتالادى جانە قۇرامىندا فوسفور جوق. سوندىقتان اينالانى قورشاعان ورتاعا ەشبىر قاۋىپ توندىرمەيدى. تابيعي جانە سىرتقى فاكتورلارعا ءتوزىمدى بولىپ كەلەدى.

قۇرىلىس ماتەريالدارىن وندىرۋدە تاجىريبەسى بار قوس كاسىپكەر قابىرعا جانە قۇم بلوكتارىن، شلاكبلوكتارىن شىعارۋمەن اينالىسادى. سونىمەن قاتار، قۇرىلىس ماتەريالدارىن ساتۋدىڭ قىر-سىرىن مەڭگەرگەن. جوبانى جۇزەگە اسىرۋ ءۇشىن جەكە مەنشىگىندە عيمارات تا بار.

«قازىرگى تاڭدا ەنەرگيا ۇنەمدەيتىن جاياۋجول پليتكاسىنىڭ ماڭىزى زور. بۇل «ەنەرگيا ۇنەمدەۋ - 2020» مەملەكەتتىك باعدارلاماسىنا سايكەس كەلەدى. ەلەكتر ەنەرگياسىن تۇتىنبايتىن ەكولوگيالىق تازا ءونىم. سونداي-اق، جارىق ديودتى ونىمدەر ساناتىنا جاتپايدى، سەبەبى ەنەرگيا تالاپ ەتپەيدى. كۇندىز قاراپايىم بەتون پليتا سياقتى بولىپ كورىنەدى دە، كەش باتقاندا جارىق شاشىپ تۇرادى»، - دەيدى تالعات جۇماتايەۆ.

كاسىپكەر ەلىمىز بويىنشا مۇنداي ءوندىرىستىڭ بالاماسى جوق ەكەنىن ايتادى. سوندىقتان كۇن قۋاتىن سىڭىرەتىن پليتامەن بۇكىل ەلدى قامتۋدى كوزدەپ وتىر. ەنەرگيا ۇنەمدەيتىن جاياۋجول پليتاسى كۇنى بويى جارىقتى ءسىڭىرىپ، قاراڭعىدا سونى جارىق رەتىندە اق-جاسىل تۇستە شاشىپ تۇرادى. - تۇرعىندار كەشكى ۋاقىتتا جارىق بەرەتىن جولمەن سەرۋەندەگەندە ەرتەگى الەمىنە تاپ بولعانداي كۇيگە ەنەدى، - دەيدى ول. - عاجايىپ اسەردى جاياۋجولعا ارنالعان ءىرى جانە ۇساق پليتالارىن موزايكا رەتىندە توسەپ نەمەسە شەتىنە ۇيلەستىرۋ ارقىلى كۇشەيتۋگە بولادى. كەشكى ۋاقىتتا پوليمەرلىك ۇساق بولشەكتەردىڭ نىعىزدالۋىنان جارىق بولىنەدى. مۇنداي جارىق تۇرعىنداردى عانا ەمەس، قالا قوناقتارىن دا تاڭ قالدىراتىنى انىق. وسى ءوندىرىستى ىسكە قوسۋ ارقىلى قالا كوركىنە ەشبىر شىعىنسىز-اق جاڭا يننوۆاتسيالىق كورىك بەرە الامىز».

ايتا كەتەيىك، كاسىپكەرلەر رەسەيلىك زاۋىتپەن «لۋنا» جارقىرايتىن جاياۋجول پليتاسىنىڭ تەحنولوگياسىن قولدانۋ ماقساتىندا ديلەرلىك كەلىسىم جاساعان.