جاپونيا قازاقستانداعى مەديتسينا سالاسىنىڭ دامۋىنا قولداۋ كورسەتۋگە دايىن
كەزدەسۋ بارىسىندا دەلەگاتسيا 2000 -جىلى اۋرۋحاناعا جاپونيا ۇكىمەتىنىڭ گرانتى بويىنشا بولىنگەن مەديتسينالىق جابدىقتاردىڭ جاي- كۇيىمەن تانىستى، دەپ حابارلايدى ەلوردا اكىمدىگىنىڭ باسپا ءسوز قىزمەتى.
بۇگىنگى تاڭدا اۋرۋحانادا جاپونيالىق گرانتپەن بەرىلگەن قۇرىلعىلاردىڭ ىشىندە كومپيۋتەرلىك توموگراف، لاپاروسكوپيالىق جابدىق، رەنتگەن جابدىعى، زەرتحانالىق- دياگنوستيكالىق قۇرىلعى، ميكروسكوپتار، اناليزاتورلار، ۋدز اپپاراتتارى، ەلەكتروندى- وپتيكا وڭدەگىش، تاسىمالداناتىن رەنتگەن اپپاراتتارى قولدانىلادى. مەديتسينالىق تەحنيكانىڭ جاي- كۇيىنە وزدەرىنىڭ وڭ باعاسىن بەرگەن دەلەگاتسيا مۇشەلەرى جاپونيانىڭ الداعى ۋاقىتتا ىنتىماقتاستىقتا جۇمىس ىستەۋگە دايىن ەكەندىگىن جەتكىزدى.
«مەديتسينالىق جابدىقتاردىڭ جاي- كۇيى ونىڭ قانشالىقتى ۇقىپتى پايدالانىلاتىندىعىنا بايلانىستى. بۇگىن قوندىرعىلار مەن قۇرىلعىلاردى كورىپ، تاڭ قالعانىم راس. ءبىراز جىل بۇرىن شىعارىلعاندىعىنا قاراماستان، تەحنيكا جۇمىس ىستەپ تۇر. ءتىپتى، ولاردىڭ اراسىندا ءالى دە جوندەۋگە بەرىلمەگەن قۇرىلعىلار بار. قازاقستان - دامۋشى مەملەكەت. ال مەديتسينا سالاسى زامان تالاپتارىنا جاۋاپ بەرۋى ءتيىس. ءبىز ءسىزدىڭ ەلگە بۇل ىستە قولىمىزدىڭ ۇشىن بەرىپ، الداعى ۋاقىتتا بىرگە جۇمىس ىستەۋگە دايىنبىز»، - دەدى جاپونيانىڭ قارجى مينيسترلىگى بيۋدجەتتىك بيۋروسىنىڭ شەتەلدىك ىستەر بيۋدجەتى جونىندەگى ينسپەكتورى ۆاتانابە ماسااكي.
كەزدەسۋ بارىسىندا اۋرۋحانا قۇرىلىمىنا ەنەرگيا ساقتاۋشى ەلەمەنتتەردى ەنگىزۋ جانە يننوۆاتسيالىق تەحنولوگيالاردى ەنگىزۋدىڭ ستراتەگيالىق باعىتىن وزگەرتۋ ماسەلەلەرى تالقىلاندى. شارا سوڭىندا قالالىق № 2 بالالار اۋرۋحاناسىنىڭ جەتەكشىلىگى مەديتسينالىق مەكەمەنىڭ ينفراقۇرىلىمىن دامىتۋدا ەكى ەل اراسىنداعى ىنتىماقتاستىقتىڭ ماڭىزدىلىعىن تىلگە تيەك ەتتى. بۇل ءوز كەزەگىندە ەكى تاراپقا اۋرۋحانا مەنەدجمەنتىندە ءوز تاجىريبەسىمەن بولىسۋگە سەپتىگىن تيگىزبەك.
www.24.kz