يزرايل ءبىرقاتار اۋرۋدان ءولىم- ءجىتىمنىڭ تومەندەۋى جاعىنان ا ق ش- تان وزدى

استانا. قازاقپارات -  يزرايل ازاماتتارىنىڭ ءومىر ءسۇرۋ ۇزاقتىعىن ارتتىرۋعا بارىن سالىپ جاتىر. قول جەتكىزگەن ناتيجەلەرى دە بارشىلىق. ماماندار ەرتە دياگنوستيكالاۋدىڭ بارلىق جۇيەسىن ازىرلەپتى.

بۇل ءوز كەزەگىندە كوپتەگەن اۋرۋلاردى العاشقى كەزەڭنەن انىقتاپ، ۋاقىتىندا ەمدەۋگە مۇمكىندىك بەرەدى ەكەن. دۇنيەجۇزىلىك دەنساۋلىق ساقتاۋ ۇيىمى يزرايل مەديتسيناسى العا باسىپ كەلە جاتقانىن مويىندادى. شاعىن عانا مەملەكەت حالقىنىڭ ۇزاق ءومىر سۇرەتىندىگىمەن الەمدە 8-ەل سانالادى.

 اسىرەسە ەر ادامدارى الدەقايدا ۇزاق عۇمىر كەشەدى. جەرگىلىكتى عالىمداردىڭ پايىمىنا سۇيەنسەك، ادامدار قارتايعاننان ەمەس، كوپ جاعدايدا اۋرۋدىڭ سالدارىنان ومىردەن ءوتىپ جاتادى. بۇدان شىعاتىن پرينتسيپ بىرەۋ: اۋرۋدىڭ الدىن الساڭ - ۇزاق جاسايسىڭ. جالپى الەم مويىنداعان يزرايل مەديتسيناسىنىڭ وزىندىك ارتىقشىلىعى بار. ول دارىگەرلەردىڭ اقپاراتپەن قامتاماسىز ەتىلۋىندە. وندا ناۋقاستىڭ اناليزدەرى، دارىگەرگە قارالۋ تاريحى، وپەراتسيالارى جانە قابىلداعان ءدارى- دارمەگى تۋرالى دەرەكتىڭ ءبارى ءبىرىڭعاي دەرەكقوردا ساقتالادى.

 وسىنداي ماگنيتتىك كارتانىڭ كومەگىمەن كەز كەلگەن دارىگەر نەمەسە ءدارىحاناداعى فارماتسيەۆت ەمدەلۋشى جايلى اقپارات الا الادى. ارينە اۋرۋدى ەمدەۋ جەتكىلىكسىز. باستىسى، ونىڭ الدىن الۋ. ۆاكتسيناتسيالاۋ يزرايلدە مەملەكەت جۇرگىزىپ وتىرعان ساياسات بوپ سانالادى. ياعني بەلگىلى ءبىر جاستان باستاپ، ەل تۇرعىندارى ەكپە قابىلداۋعا مىندەتتەلەدى. بۇل ءوز كەزەگىندە ءتۇرلى دەرتتەردەن كەلەتىن قاۋىپتى تومەندەتەدى. اۋىرماساڭ ءومىر جاسىڭ دا ۇزاق بولادى دەگەن ءسوز.

ەۆگەنيي شۋستەر، وتباسىلىق دارىگەر:

 - سوڭعى كەزدەرى دياگنوستيكادان ءوتىپ، گيپەرتونيكالىق اۋرۋدان ەمدەلىپ جاتقان ادامداردىڭ سانى كوبەيدى. حولەستەرين نەمەسە قانت ديابەتىنە شالدىققاندار تەكسەرىلىپ، ءتيىستى ەم- دومىن الىپ جاتىر. يزرايل مەديتسيناسى وسى ساناتتاعى ناۋقاستاردىڭ قاتارىن ازايتىپ، حالىقتىڭ ءومىر ءسۇرۋ جاسىن ۇزارتۋعا بارىن سالىپ وتىر.

قازىر ەلدە جۇرەك- قان تامىرلارى اۋرۋىنان، ينفاركتتان جانە قانت ديابەتىنەن اجال قۇشاتىنداردىڭ سانى ازايعان. بۇل جاعىنان ەۆرەي حالقى، ءتىپتى  ۇلى بريتانيا، گەرمانيا، ا ق ش- تى دا باسىپ وزدى. ونكولوگيا بويىنشا دا بۇل مەملەكەتتىڭ جەتكەن جەتىستىگى تاۋداي. قاتەرلى ىسىك اۋرۋلارىنان قۇلان تازا ايىعىپ شىعاتىندار دا وسى مەملەكەتتە كوپتەپ كەزدەسەتىنىن ستاتيستيكا دالەلدەپ ءجۇر.

 اۆراام كوتەن، يزرايلدىڭ باس ونكولوگى:

- يممۋنوتەراپيانىڭ كومەگىمەن ءبىز كوپتەگەن جاقسى ناتيجەلەرگە قول جەتكىزدىك. بۇل ءسىز ويلاعانداي، يممۋنيتەتتى كوتەرۋگە ارنالعان پروتسەدۋرالار ەمەس. كەرىسىنشە سىرتقى فاكتورلاردىڭ كومەگىمەن، راك كلەتكالارىنا اسەر ەتەتىن تەراپيانىڭ ەرەكشە ءتۇرى. وكپەنىڭ قاتەرلى ىسىگىنە شالدىققاندار بۇرىن ۇزاق جاسامايتىن. قازىر ولاردىڭ دا ءومىر ءسۇرۋ ۋاقىتى ءبىرشاما ۇزاردى. مۇندا ەشقانداي دا سيقىر جوق. تەك، ساراپتامانىڭ ناقتى حاتتامالارى بار. يزرايلدىك دارىگەرلەر ناۋقاس كەلىپ اناليز تاپسىرمايىنشا تەلەفونىنا تىنىم بەرمەيدى. بۇنىڭ گۋمانيزمگە نەمەسە الترۋيزمگە ەشقانداي قاتىسى جوق. تەك ەكونوميكالىق ەسەپ عانا. اۋرۋدى اسقىندىرىپ العانشا، العاشقى ساتىسىندا ەمدەگەن ءجون. مەملەكەتكە بۇل ايتارلىقتاي ارزان تۇسەدى.

www.24.kz