عالىمدار اقپاراتتى ەستە ساقتاۋدىڭ جاڭا جولىن ويلاپ تاپتى
شوتلاندياداعى حەريوت- ۋاتت ۋنيۆەرسيتەتىنىڭ پسيحولوگتارى جاڭا اقپاراتپەن جۇمىستان كەيىن 10 مينۋت دەمالۋ ارقىلى ەستە ساقتاۋ قابىلەتىن ايتارلىقتاي جاقسارتۋعا بولاتىنىن دالەلدەدى. زەرتتەۋ جۇمىسى Scientific Reports جۋرنالىندا جاريالاندى.
«سوڭعى زەرتتەۋلەر ناتيجەسى اقپاراتتى «قايتالاۋ» ارقىلى كوپكە دەيىن ەستە ساقتاۋعا بولاتىنىن كورسەتتى. مي بەلسەندى بولىپ تۇرعان كەزدە اۆتوماتتى تۇردە ءبىر اقپاراتتى بىرنەشە رەت قايتالايدى. بۇل، اسىرەسە، ۇيىقتاپ جاتقاندا نەمەسە اقپاراتتى وقىعاننان كەيىن دەمالىپ وتىرعاندا بايقالادى» ، - دەيدى جاڭا جۇمىس اۆتورلارىنىڭ ءبىرى مايكل كرەيگ (Michael Craig) .
عالىمدار ادامنىڭ جاڭا اقپاراتتى قانشالىقتى جاقسى ەستە ساقتايتىنىن انىقتاۋعا كومەكتەسەتىن تەست ويلاپ تاپتى. ءبىرىنشى ەكسپەريمەنتكە 18-31 جاس ارالىعىنداعى 60 ەرىكتى قاتىستى. ەرىكتىلەرگە 60 سۋرەت كورسەتىلىپ، كەيىن ولاردى ءۇش توپقا ءبولدى.
ءبىرىنشى توپ مۇشەلەرى 10 مينۋت بويى دەمالدى. ەكىنشى توپ مۇشەلەرى سۋرەتتەر اراسىنداعى ايىرماشىلىقتى انىقتاۋ ويىنىن وينادى. ال ءۇشىنشى توپ مۇشەلەرى بىردەن كەلەسى كەزەڭگە ءوتىپ كەتتى. وسى كەلەسى كەزەڭ تاپسىرماسىن باسقالارعا قاراعاندا ءبىرىنشى توپ مۇشەلەرى ءساتتى ورىنداپ شىقتى.
عالىمدار جاڭا اقپاراتتى ەستە ساقتاۋعا ۇيقى كومەكتەسەتىنىن ايتىپ كەلگەن بولاتىن. ال قازىر بۇل مەحانيزمنىڭ كۇندىز دە جاقسى جۇمىس ىستەيتىنى بەلگىلى بولدى. ياعني ادامعا اقپاراتتى ەستە ساقتاۋ ءۇشىن مىندەتتى تۇردە ۇيىقتاۋدىڭ قاجەتى جوق.
پسيحولوگ ماماندار ەندى دەمالىستىڭ اقپاراتتى ەستە ساقتاۋ كەزىندە مي بەلسەندىلىگىنە قالاي اسەر ەتەتىنىن انىقتاماق. بۇل زەرتتەۋ جۇمىسىن سوڭىنا دەيىن جەتكىزۋ ءۇشىن ەرىكتىلەردى ەلەكتروەنتسەفالوگرافيا تاسىلىمەن زەرتتەيتىن بولادى. مۇنداي زەرتتەۋ تۇرلەرى اقپاراتتى ەستە ساقتاۋ كەزىندە ميدىڭ قانداي بولىكتەرىنىڭ جۇمىس ىستەيتىنىن انىقتاۋعا كومەكتەسەدى. سونداي- اق، عالىمدار 60 جاستان اسقان ەرىكتىلەردىڭ قاتىسۋىمەن تاعى ءبىر زەرتتەۋ جۇمىسىن جۇرگىزبەك.
ەستەرىڭىزگە سالا كەتسەك، كاناداداعى ۋوتەرلۋ ۋنيۆەرسيتەتىنىڭ عالىمدارى داۋىستاپ وقۋ ارقىلى اقپاراتتى جاقسىلاپ ەستە ساقتاۋعا بولاتىنى تۋرالى ايتقان ەدى.
Baq.kz