اۋىل تۇرعىندارى ءۇشىن جەر جانە باسپاناعا قۇقىقتاردى راسىمدەۋ جەڭىلدەۋى مۇمكىن

استانا. قازاقپارات - اۋىل تۇرعىندارىنا كەيبىر قىزمەتتەردى جەڭىلدىك شارتتارىمەن راسىمدەۋگە مۇمكىندىك بەرۋ قاجەت. بۇل تۋرالى بۇگىن ۇكىمەت وتىرىسىندا جەرگىلىكتى ءوزىن- ءوزى باسقارۋدى ەنگىزۋ ماسەلەلەرى جونىندە بايانداعان ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات.

ءمينيستردىڭ ايتۋىنشا، جەرگىلىكتى ءوزىن- ءوزى باسقارۋدى ەنگىزۋ ءىس- شارالارى جوسپارىنىڭ ءبىرقاتار تارماقتارى ءالى دە ورىندالۋ ساتىسىندا.

«ءبىرىنشى - تىركەلمەگەن جىلجىمايتىن مۇلىك نىساندارىن تىركەۋ. ءىس- شارالار جوسپارىن ىسكە اسىرۋ كەزەڭىندە تىركەلمەگەن جىلجىمايتىن نىسانداردىڭ سانى 88,2 مىڭنان 13,6 مىڭعا ازايدى.

تىركەلمەگەن جىلجىمايتىن مۇلىك نىساندارىنىڭ بولۋىنىڭ نەگىزگى سەبەپتەرى مىناداي فاكتورلارعا بايلانىستى: رەسىمدەلمەگەن جىلجىمايتىن مۇلىك نىساندارى؛ مەنشىك يەسىنىڭ قازاقستان رەسپۋبليكاسىنان تىس جەرگە كەتۋى؛ قۇقىق بەلگىلەيتىن قۇجاتتارىنىڭ بولماۋى؛ جەكە تۇلعالاردىڭ قۇجاتتاردى رەسىمدەۋگە اقشالاي قاراجاتىنىڭ بولماۋى جانە باسقالار. زاڭناماعا سايكەس ادىلەت ورگاندارىنىڭ فۋنكتسياسىنا تىركەۋ عانا كىرەتىنىن ايتا كەتكىم كەلەدى. ادىلەت ورگاندارى ادامدى مەملەكەتتىك تىركەۋگە جۇگىنۋگە مىندەتتەۋگە قۇقىعى جوق. تيىسىنشە، مەنشىك قۇقىعىن رەسىمدەۋ كەزىندە مەنشىك يەسى نەمەسە سەنىم بىلدىرىلگەن ادام بولۋى قاجەت.

تىركەلمەگەن جىلجىمايتىن مۇلىك نىساندارىنىڭ بولۋى اۋىلدىق وكرۋگتەر بيۋدجەتتەرىنە سالىقتاردىڭ تولىق تۇسپەۋىنە اكەلۋى مۇمكىن»، - دەدى تيمۋر سۇلەيمەنوۆ.

وسىعان بايلانىستى، مينيستر اكىمدەرگە ادىلەت ورگاندارىمەن بىرلەسىپ، قۇقىقتاردى مەملەكەتتىك تىركەۋگە قۇجاتتاردى ۇسىنۋ قاجەتتىگى تۋرالى زاڭنامانىڭ تالاپتارىن حالىقتىڭ اراسىندا ءتۇسىندىرۋ جۇمىسىن كۇشەيتۋ قاجەتتىگىن باسا ايتتى.

 «ەكىنشىسى - جىلجىمايتىن مۇلىككە قۇقىق بەلگىلەۋ قۇجاتتارىن رەسىمدەۋ ءۇشىن كورسەتىلگەن قىزمەتتەر قۇنىن تومەندەتۋ بويىنشا شارالار. قازىرگى ۋاقىتتا، جەر ۋچاسكەسىنە قۇقىقتاردى رەسىمدەۋ جانە مەملەكەتتىك تىركەۋ كەزىندە ءوتىنىش بەرۋشىنىڭ شىعىستارى، جەرگە ورنالاستىرۋ جوباسىن ازىرلەۋ مەن جەر ۋچاسكەسىنىڭ شەكارالارىن بەلگىلەۋدىڭ باسەكەلەس ورتادا بولۋىن ەسكەرە وتىرىپ، ورتاشا العاندا 26,5 مىڭ تەڭگەنى قۇرايدى. ءوز كەزەگىندە ءوتىنىش بەرۋشىنىڭ بەلگىلەنگەن تارتىپتە پايدالانۋعا ەنگىزىلمەگەن تۇرعىن ۇيگە قۇقىق بەلگىلەۋ قۇجاتتارىن رەسىمدەۋگە جۇمسايتىن شىعىستارى ورتاشا العاندا 31,1 مىڭ تەڭگەنى قۇرايدى. بۇل قاراجاتقا باسەكەلەستىك ورتاداعى ەسكيزدىك جوبانى دايىنداۋ كىرەدى. ال سەيسميكالىق وڭىرلەردە شىعىستار 50 مىڭ تەڭگەدەن باستالۋى مۇمكىن. وسىعان بايلانىستى، اۋىل تۇرعىندارىنا كومەك كورسەتۋ ءۇشىن 1-2 جىلدىق وتپەلى كەزەڭگە اتالعان قىزمەتتەردى جەڭىلدىك شارتتارىمەن رەسىمدەۋ ماسەلەسىن پىسىقتاۋدى ۇسىنامىز. اتاپ ايتقاندا: اقپارات جانە كوممۋنيكاتسيالار مينيسترلىگىنە «ازاماتتارعا ارنالعان ۇكىمەت» مەملەكەتتىك كورپوراتسياسىمەن بىرلەسىپ، جەر ۋچاسكەسى بويىنشا؛ ينۆەستيتسيالار جانە دامۋ مينيسترلىگىنە اقپارات جانە كوممۋنيكاتسيالار مينيسترلىگىمەن جانە اكىمدىكتەرمەن بىرلەسىپ، تۇرعىن ءۇي بويىنشا»، - دەدى ول.

اۆتور: مارلان جيەمباي