ماڭعىستاۋدا تاريحي-مادەني مۇرالار كەشەندى ەكسپەديتسياسى باستالدى
رەسەي عىلىم اكادەمياسىنىڭ رەسەي تاريحى ينستيتۋتىنىڭ باس عىلىمي قىزمەتكەرى، پروفەسسور، تاريح عىلىمدارىنىڭ دوكتورى ۆاديم ترەپاۆلوۆ باستاعان ەكسپەديتسيا مۇشەلەرى وبلىس اكىمى ەرالى توعجانوۆپەن كەزدەستى.
ەكسپەديتسيا ماقساتى - ماڭعىستاۋ وبلىسىنىڭ ماتەريالدىق جانە ماتەريالدىق ەمەس تاريحي-مادەني مۇرالارىن زەرتتەۋ ماقساتىندا شەتەلدەن عالىم-مامانداردى تارتۋ، قازاقستاننىڭ تاريحي-مادەني مۇراسىن ۇلتتىق جانە حالىقارالىق دەڭگەيدە ناسيحاتتاۋ، ماڭعىستاۋ وبلىسىنىڭ تاريحي-مادەني مۇرالارىن ايماق بويىنشا كەشەندى عىلىمي ەكسپەديتسيا وتكىزۋ ارقىلى بايانداۋ، ساكرالدى باعىتتاعى تاريح جانە مادەنيەت ەسكەرتكىشتەرىن زەرتتەۋ، وبلىس تۇرعىندارىنىڭ ءداستۇرلى جانە تۇرمىستىق باعىتتارىن، حالىق شىعارماشىلىعىن (فولكلور) زەرتتەۋ، ەپيگرافيكالىق ەسكەرتكىشتەرگە زەرتتەۋلەر وتكىزۋ (فيكساتسيا)، كەشەندى ەكسپەديتسيا قورىتىندىسى بويىنشا عىلىمي ەسەپتەر دايىنداۋ.
«ماڭعىستاۋ ءوڭىرى - وزدەرىڭىز جاقسى بىلەتىندەي، تابيعاتى بولەك، تاريحى تەرەڭدە جاتقان ايماق. عىلىمي زەرتتەۋلەردى تالاپ ەتەتىن، ەجەلگى وركەنيەت ەلى. ەلباسىمىز ن. ءا. نازاربايەۆ: «ءاربىر حالىقتىڭ، ءاربىر وركەنيەتتىڭ بارشاعا ورتاق قاسيەتتى جەرلەرى بولادى، جاس ۇرپاقتىڭ ساناسىنا سول قاسيەتتى ورىنداردىڭ ۇعىمىن ءسىڭىرۋىمىز كەرەك. بۇل - رۋحاني ءداستۇردىڭ باستى نەگىزدەرىنىڭ ءبىرى» دەگەن بولاتىن. مىنە، «رۋحاني جاڭعىرۋ» باعدارلاماسى اياسىندا وزدەرىڭىزدىڭ بىرگە ۇلكەن عىلىمي ەكسپەديتسياسىن قولعا الىپ وتىرمىز. سىزدەردىڭ ەڭبەكتەرىڭىز - ۇلتتىق تاريح پەن تانىم جانە پاتريوتيزمدى قالىپتاستىرۋعا نەگىز بولاتىنا سەنىمىم مول»، - دەدى ماڭعىستاۋ وبلىسىنىڭ اكىمى ەرالى توعجانوۆ.
عىلىمي ەكسپەديتسيا ولكەنىڭ باعا جەتپەس تاريحي مۇراسى ۇلتتىق يدەولوگيانىڭ بولىگى ەتۋ، ەلىمىزدىڭ الەمدىك برەندىن جوعارىلاتۋ، تۋعان ولكەگە دەگەن سۇيىسپەنشىلىك پەن ءپاتريوتيزمدى ارتتىرۋعا باعىتتالعان. ەكسپەديتسيا بارىسىندا نوعايلى كەزەڭىنىڭ ەسكەرتكىشتەرى جانە ايماقتىڭ شىڭىراۋ-قۇدىقتارى زەرتتەلەدى. ەكسپەديتسيا قورىتىندىسى بويىنشا «Kazakh TV» ارناسىندا قازاق، ورىس جانە اعىلشىن تىلدەرىندە تاراتىلاتىن بىرنەشە سەريادان تۇراتىن دەرەكتى فيلم دايىندالادى.
«كيەلى ماڭعىستاۋ جەرى - اتا-بابالارىمىزدىڭ مەكەنى. بۇل ايماقتى تۇركى الەمىنىڭ ارحەولوگياسىنىڭ ورتالىعىنا اينالدىرۋىمىز كەرەك. وسىنداي كەشەندى ەكسپەديتسيانى قولعا الىپ، حالىقارالىق عالىمداردى شاقىرعاندارىڭىزعا راقمەت ايتامىن»، - دەدى يزمير قالاسىنداعى (تۇركيا) ەگەي ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى مەتين ەكيچي.
سونداي-اق، جيىندا ءا. مارعۇلان اتىنداعى ارحەولوگيا ينستيتۋتىنىڭ انتيكالىق كەزەڭ جانە ورتا عاسىر ارحەولوگياسى ءبولىمىنىڭ اعا عىلىمي قىزمەتكەرى ەردەن ورالباي ماڭعىستاۋ وبلىسىنان ارحەولوگيا ينستيتۋتىنىڭ فيليالىن اشۋدى ۇسىندى.
ەكسپەديتسيا مارشرۋتىنىڭ جالپى ۇزاقتىعى - 2000 كيلومەتر. ەكسپەديتسيا مەرزىمى: 10 كۇن.