نۇرسۇلتان نازاربايەۆ قارا تەڭىز بەن كاسپي تەڭىزدەرىن سۋ جولىمەن جالعاۋدى ۇسىندى
قازاقستان پرەزيدەنتىنىڭ اتاپ وتۋىنشە، ەڭ بىرىنشىدەن بۇعان دەيىن قابىلدانعان شەشىمدەردىڭ ورىندالۋىن سارالاپ، كەشەندى شارالار ازىرلەۋ ءۇشىن وداققا مۇشە ەلدەردىڭ ارنايى ۇكىمەت ارالىق جۇمىس توبىن قۇرۋ قاجەت. جۇمىس توبى شەكارادا، سونىمەن قاتار ەكونوميكانىڭ سالالارى اراسىنداعى ساۋداعى كەدەرگىلەردى انىقتاۋ ءتيىس.
«ەكىنشىدەن، قازىرگى سانكسيا ىقپالىنداعى كۇردەلى جاعدايلاردى ەسكەرە وتىرىپ، بىزگە ودان ءارى قالاي جۇمىس ىستەۋ كەرەكتىگىن قاراستىرۋ قاجەت. بايلانىستاردى ودان ءارى دامۋ جانە تەرەڭدەتۋ دەكلاراتسياسى تۋرالى ۇسىنىس ەنگىزىلدى. وسى جۇمىستار ءبىز وسى ۋاقىتقا دەيىن نە ىستەگەندىگىمىزدى تۇسىنگەن كەزدە عانا جۇرگىزىلۋى ءتيىس. ەگەر ءبىز بارلىعىن ورىنداعان بولساق، وندا قاتىناستاردى تەرەڭدەتۋ جايىندا ايتۋعا بولادى»، - دەپ اتاپ ءوتتى نۇرسۇلتان نازاربايەۆ.
ۇشىنشىدەن، قازاقستان پرەزيدەنتى ءىرى ينفراقۇرىلىمدىق مەگاجوبالاردى جۇزەگە اسىرۋ مۇمكىنشىلىكتەرىن قاراستىرۋ قاجەتتىگىنە نازار اۋداردى.
«وعان ەۋروپا مەن ازيانى رەسەي جانە قازاقستان ارقىلى جالعايتىن «ەۋرازيا» جوعارى جىلدامدىقتى تەمىر جول ماگيسترالى جوباسى جاتادى. كەلەسى كەلەشەگى زور جوبا قارا تەڭىز جانە كاسپي تەڭىزدەرىن سۋ جولىمەن بايلانىستىرۋعا مۇمكىندىك بەرەتىن «ەۋرازيا كەمە ارناسى قۇرىلىسى بولا الار ەدى. بۇل، ارينە، ءىرى جوبالار. ءبىراق، ءبىز ولاردى قولعا الۋعا ءتيىسپىز. باسقاشا سوزبەن ايتار بولساق، ەۋرازيالىق ەكونوميكالىق وداق ينفراقۇرىلىمى ازيا مەن ەۋروپانىڭ، شىعىس پەن باتىستىڭ، تىنىق جانە اتلانت مۇحيتتارىنىڭ اراسىنداعى جاقسى كوپىر بولا الادى»، - دەدى قازاقستان پرەزيدەنتى.
تورتىنشىدەن، نۇرسۇلتان نازاربايەۆ ەاەو قىزمەتىندە ەۋرازيالىق دامۋ بانكى مەن ەۋرازيالىق تۇراقتاندىرۋ جانە دامۋ قورىنىڭ ءرولىن ارتتىرۋ قاجەتتىگىن باسا ايتتى.
«ولار ءىرى جوبالاردى جۇزەگە اسىرۋعا بەلسەندى تۇردە قاتىسۋى كەرەك»، - دەپ تۇيىندەدى ءسوزىن نۇرسۇلتان نازاربايەۆ.
ايتا كەتەيىك، رەسەيدىڭ سوچي قالاسىندا مەملەكەت باسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ (ج ە ە ك) كەزەكتى وتىرىسى وتۋدە. شاراعا قازاقستان پرەزيدەنتى نۇرسۇلتان نازاربايەۆ، رەسەي باسشىسى ۆلاديمير پۋتين، قىرعىزستان پرەزيدەنتى سوورونباي جەەنبەكوۆ، بەلارۋس باسشىسى الەكساندر لۋكاشەنكو جانە ارمەنيا پرەمەر- ءمينيسترى نيكول پاشينيان قاتىسۋدا. باسقوسۋدا ەۋرازيالىق ەكونوميكالىق وداق (ەاەو) اياسىنداعى كوپباعىتتى ىنتىماقتاستىقتىڭ ءتۇرلى اسپەكتىلەرى، ۇيىمنىڭ ۇيىمداستىرۋ- كادرلىق باعىتتاعى شارالارى مەن اعىمداعى جۇمىس بارىسى ءسوز بولادى دەپ كۇتىلەدى. كۇن تارتىبىنە 15 ماسەلە قويىلعان. ولاردىڭ ەكەۋى شاعىن قۇرامدا قارالادى.
اۋدارما: مارلان جيەمباي