سوچيدە نۇرسۇلتان نازاربايەۆ رەسەي پرەزيدەنتىمەن كەزدەستى

سوچي. قازاقپارات - جوعارى ەۋرازيالىق ەكونوميكالىق كەڭەستىڭ كەزەكتى وتىرىسى اياسىندا قازاقستان پرەزيدەنتى نۇرسۇلتان نازاربايەۆ پەن رەسەي پرەزيدەنتى ۆلاديمير پۋتين ەكىجاقتى كەزدەسۋ وتكىزدى، دەپ حابارلايدى قازاقپارات ءتىلشىسى.

نۇرسۇلتان نازاربايەۆ ۆلاديمير پۋتيندى رەسەي فەدەراتسياسىنىڭ پرەزيدەنتى بولىپ سايلانۋىمەن قۇتتىقتاپ، 18 - ناۋرىزدا رەسەي حالقىنىڭ سەنىمىنە يە بولعاندىعىن باسا ايتتى.

 «وسىناۋ كۇردەلى جاعدايلاردا بۇل كوپ دۇنيەگە تاتيدى. بۇل ءسىزدىڭ رەسەي مەن ونىڭ حالقىنىڭ بەدەلى مەن ماقتانىشتىن كوتەرۋ ءۇشىن جۇرگىزىپ وتىرعان جۇمىس جانە سول باعىتقا دەگەن سەنىم. سوندىقتان دا ولار جۇمىلىپ، سىزگە قولداۋ كورسەتتى. اللا تاعالا سىزگە بارلىعىن شىداپ، رەسەيدى ۇلكەن جانە جارقىن جولعا شىعارار دەنساۋلىق بەرسىن. ءبىز، قازاقستان رەسەيدىڭ ەڭ جاقىن كورشىسى رەتىندە سونى بارىنشا قالايمىز. ەڭ ۇلگىلى قارىم- قاتىناسىمىز پەن ەكونوميكالىق بايلانىستارىمىز بار. ءسىز ەكى ەل اراسىنداعى تاۋار اينالىمنىڭ 16 ميلليارد دوللاردان اسىپ جىعىلعانىن جانە بىرلەسكەن كاسىپورىندار قۇرۋ ۇدەمەلى تۇردە ءجۇرىپ جاتقانىن ايتتىڭىز. بۇل ءبىزدىڭ ۋاعدالاسقان جايتتارىمىز بولاتىن»، - دەپ اتاپ ءوتتى مەملەكەت باسشىسى.

نۇرسۇلتان نازاربايەۆ قازاقستاننىڭ بارلىق ۋاقىتتا رەسەيمەن بىرگە بولاتىندىعىن اتاپ ءوتتى.

 «بارلىق ۋاقىتتا بىرگە جۇمىس ىستەپ، كەزدەسكەن كەدەرگىلەردى بىرگە ەڭسەرەمىز جانە بارلىق باعاتتا بىرلەسە وتىرىپ العا جىلجيمىز. جۇمىس دۇرىس ءجۇرىپ جاتىر. كەشە ءبىز ورىن الىپ وتىرعان بارلىق ماسەلەلەردى ايتتىق. ولار بارلىق ۋاقىتتا دا كورشىلەر، تاۋەلسىز مەملەكەتتەر اراسىندا تۋىندايدى. ءبىراق، ۇكىمەتتەردىڭ، مينيسترلەردىڭ اراسىنداعى بارىنشا تىعىز قارىم- قاتىناس بولعاندىقتان تۋىنداعان ماسەلەلەردى اسىقپاي، ەشقانداي دۇربەلەڭ تۋىنداتپاي شەشۋ قاجەت. ءبىز وداقتاستارمىز، كورشى مەملەكەتتەرمىز جانە ەكى ەلدىڭ دە ب ا ق- تارى (اقپارات قۇرالدارى) تۇيمەدەيدى تۇيەدەي ەتپەي شىنايى جۇمىس ىستەۋى ءتيىس. ەگەر ماسەلەلەر تۋىنداسا، وندا ءبىز ونى شەشەمىز. ءبىز بارلىق ۋاقىتتا سولاي جاسايمىز، وسى 25 جىلدىڭ ىشىندە سولاي جۇمىس جاساپ كەلدىك»، - دەدى قازاقستان پرەزيدەنتى.

 ءوز كەزەگىندە ۆلاديمير پۋتين قازاقستاننىڭ رەسەيدىڭ ستراتەگيالىق وداقتاسى، ەڭ جاقىن سەرىكەستەرىنىڭ ءبىرى ەكەندىگىن جانە ەكى ەلدىڭ اراسىنداعى قارىم- قاتىناس تابىستى ءارى رەت رەتىمەن دامىپ كەلە جاتقاندىعىن باسا ايتتى.

«ەكونوميكادا وتكەن جىلى ءبىز جاقسى ناتيجەگە قول جەتكىزدىك، تاۋار اينالىمىنىڭ ءوسىمى 30,5 پايىزعا ارتتى. رەسەي قازاقستاننىڭ جەتەكشى ساۋدا- ەكونوميكالىق سەرىكتەستەرىنىڭ ءبىرى سانالادى. قازاقستان ەكونوميكاسىنا دا تىكەلەي ينۆەستيتسيا كولەمىنىڭ ارتا تۇسكەندىگىن اتاپ وتپەكپىن. بىزدە ىنتىماقتاستىقتىڭ باعىتتارى كوپ. ءبىز سىزبەن بارلىق وسى ماسەلەلەر بويىنشا ۇنەمى بايلانىستامىز. بۇگىنگى سامميت الاڭىندا ەكىجاقتى ىستەر جايىندا دا سويلەسۋگە وسىنداي مۇمكىندىكتىڭ تۋعانى جاقسى بولدى»، - دەدى رەسەي پرەزيدەنتى.

 ايتا كەتەيىك، رەسەيدىڭ سوچي قالاسىندا مەملەكەت باسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ (ج ە ە ك) كەزەكتى وتىرىسى ءوتىپ جاتىر.

شاراعا قازاقستان پرەزيدەنتى نۇرسۇلتان نازاربايەۆ، رەسەي باسشىسى ۆلاديمير پۋتين، قىرعىزستان پرەزيدەنتى سوورونباي جيەەنبەكوۆ، بەلارۋس باسشىسى الەكساندر لۋكاشەنكو جانە ارمەنيا پرەمەر- ءمينيسترى نيكول پاشينيان قاتىسۋدا.

 باسقوسۋدا ەۋرازيالىق ەكونوميكالىق وداق (ەاەو) اياسىنداعى كوپ باعىتتى ىنتىماقتاستىقتىڭ ءتۇرلى اسپەكتىلەرى، ۇيىمنىڭ ۇيىمداستىرۋ- كادرلىق باعىتتاعى شارالارى مەن اعىمداعى جۇمىس بارىسى ءسوز بولادى دەپ كۇتىلەدى. كۇن تارتىبىنە 15 ماسەلە قويىلعان. ولاردىڭ ەكەۋى شاعىن قۇرامدا قارالادى.

اۋدارما: مارلان جيەمباي