سوچيدە جوعارى ەۋرازيالىق ەكونوميكالىق كەڭەس وتىرىسى باستالدى

سوچي. قازاقپارات - رەسەيدىڭ سوچي قالاسىندا مەملەكەت باسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ كەزەكتى وتىرىس ءوز جۇمىسىن باستادى، دەپ حابارلايدى قازاقپارات ءتىلشىسى.

 شاعىن قۇرامداعى كەلىسسوزدەر بارىسىندا رەسەي پرەزيدەنتى ۆلاديمير پۋتين ارمەنيا پرەمەر- ءمينيسترى نيكول پاشينيانعا قوشەمەت كورسەتىپ، جوعارى مەملەكەتتىك لاۋازىمعا تاعايىندالۋىمەن قۇتتىقتادى.

 «بۇگىن بىزدە بارىنشا مازمۇندى كۇن ءتارتىبى بار ەكەندىگىن اتاپ وتپەكپىن. وداق قىزمەتىنىڭ قورىتىندىسىن شىعارىپ، ينتەگراتسيانى ودان ءارى تەرەڭدەتۋ بويىنشا ءبىرقاتار ستراتەگيالىق شەشىمدەر قابىلداۋ مىندەتى تۇر. 2018 -جىلى ۇيىمعا جانە ە ا ە و ورگاندارىنا ءتوراعالىق ەتەتىن رەسەي بىرلەسكەن جۇمىستىڭ تولىققاندى باعدارلاماسىن ۇسىندى. (...) بۇل باعىتتاردىڭ كوپشىلىگى بويىنشا ايتارلىقتاي جەتىستىكتەر دە بار. ىشكى تاۋار اينالىمى، ءۇشىنشى ەلدەرگە تاۋارلار مەن قىزمەتتەر جەتكىزۋ كولەمى ارتىپ كەلەدى. ەكسپورت قۇرىلىمى دا جاقسارىپ، جوعارى قوسىلعان قۇنى بار ونىمدەردىڭ ۇلەسى كەڭەيۋدە. بىرلەسكەن جاڭا كاسىپورىندار قۇرىلىپ، كەلەشەگى زور جوبالار ىسكە قوسىلىپ جاتىر. سونىڭ ناتيجەسىندە وداققا مۇشە بارلىق ەلدەردىڭ جالپى ىشكى ونىمدەرى ارتا تۇسۋدە»، - دەدى ۆلاديمير پۋتين.

ونىڭ اتاپ وتىنشە، اتوم جانە جاڭاراتىن ەنەرگيا، ەكولوگيا، مەديتسينا، عارىش، تۋريزم جانە سپورت سىندى سالالاردا تىعىز ءوزارا ءىس- قيمىل ءۇشىن جاقسى مۇمكىنشىلىكتەر بار.

«الەۋمەتتىك- گۋمانيتارلىق سالا، ءبىلىم بەرۋ، سونىمەن قاتار ءوڭىر ارالىق جانە شەكارا ارالىق بايلانىستاردى تەرەڭدەتۋدەگى ىنتىماقتاستىققا بارىنشا نازار اۋدارۋ پايدالى بولار ەدى»، - دەدى رەسەي پرەزيدەنتى.

ايتا كەتەيىك، باسقوسۋدا ەۋرازيالىق ەكونوميكالىق وداق (ە ا ە و) اياسىنداعى كوپ باعىتتى ىنتىماقتاستىقتىڭ ءتۇرلى اسپەكتىلەرى، ۇيىمنىڭ ۇيىمداستىرۋ- كادرلىق باعىتتاعى شارالارى مەن اعىمداعى جۇمىس بارىسى ءسوز بولادى دەپ كۇتىلەدى. كۇن تارتىبىنە 15 ماسەلە قويىلعان. ولاردىڭ ەكەۋى شاعىن قۇرامدا قارالادى.

فوتو: tass.ru

اۋدارما: مارلان جيەمباي