قازاقستاندا دوللارمەن بىرگە اسكەري تەحنيكانى جوندەۋ قۇنى نەگە قىمباتتايدى

استانا. قازاقپارات - ق ر پارلامەنتى ءماجىلىسى ءتوراعاسىنىڭ ورىنباسارى ۆلاديمير بوجكو اسكەري تەحنيكانى كۇردەلى جوندەۋدەن وتكىزۋ شارالارىن سىنعا الدى، دەپ حابارلايدى قازاقپارات ءتىلشىسى.

«ءوندىرىس لوكاليزاتسياسىن دامىتۋ قاجەتتىگى بار. سونىمەن قاتار ءونىم قۇنىن شامادان تىس قىمباتتاتۋدى باستاعان كاسىپورىندارعا ىقپال ەتۋ كەرەك. مىسالى ءۇش جىلدا م ي-1785 تىكۇشاعىن كۇردەلى جوندەۋدەن وتكىزۋ 854 ميلليون تەڭگەدەن 1 ميلليارد 555 ميلليون تەڭگەگە دەيىن وسكەن. وسى كەزەڭدە كاماز اۆتوكولىكتەرىن قۇراستىرۋ 2015  -جىلداعى 11 ميلليون تەڭگەدەن 2018 -جىلى 23 ميلليون تەڭگەگە دەيىن قىمباتتادى. ال ت-72 تانكىسىن كۇردەلى جوندەۋ قۇنى 194 ميلليوننان 412 ميلليون تەڭگەگە دەيىن ءوستى. ب م پ-2 جانە ب ت ر- 0 تەحنيكالارىن جوندەۋ باعاسى 2015-2018 -جىلدار ارالىعىندا ەكى ەسەگە ارتتى»، - دەپ توقتالدى بوجكو ماجىلىستەگى ۇكىمەت ساعاتىندا.

سونىمەن قاتار ول رەسەيدەن ساتىپ الىناتىن اسكەري تەحنيكا بولشەكتەرىنىڭ قىمباتتاۋى قيسىنسىز جاعداي ەكەنىن اتاپ ءوتتى.

«كەڭ دياپازونداعى راديوستانسالار دا ەكى ەسە قىمباتتاعان. اتاپ ايتقاندا، قورعانىس مينيسترلىگىنىڭ اسكەري قابىلداۋ ينستيتۋتى بار عوي، ولار ءوندىرىستىڭ ساپاسىمەن قاتار، شىعىنداردىڭ قۇنىن دا زەردەلەۋى ءتيىس. رۋبل - ول دوللار ەمەس ەكەنى تۇسىنىكتى، ياعني ونىڭ باعامى ەكى- ءۇش ەسەگە ارتقان جوق. بۇدان بۇرىن مەملەكەت باسشىلارىمەن قول قويىلعان قۇجاتتارعا سايكەس، اسىرەسە قازاقستان مەن رەسەي اراسىنداعى ۋاعدالاستىققا وراي، ءبىز تەحنيكا بولشەكتەرىن رەسەيلىك ىشكى باعامەن ساتىپ الۋعا قاۋقارلىمىز. سوندىقتان دا دوللاردىڭ قىمباتتاۋىنا بايلانىستى قورعانىس تەحنيكاسىن جوندەۋ قۇنى ءۇش ەسەگە ءوستى دەگەن ءۋاج ەشقانداي سىندى كوتەرمەيدى»، - دەپ ءتۇيدى ۆ. بوجكو.

اۆتور: رۋسلان عابباسوۆ