ش ق و نامىسىن «قازاقستان بارىسىندا» ايبەك نۇعىماروۆ قورعايدى

استانا. قازاقپارات - سەمەيدە قازاق كۇرەسىنەن ەلىمىزدىڭ تۇڭعىش پرەزيدەنتى ن. ءا. نازاربايەۆتىڭ جۇلدەسى ءۇشىن وتەتىن رەسپۋبليكالىق «قازاقستان بارىسى» تۋرنيرىنە ىرىكتەۋ رەتىندە وبلىستىق سايىس ءوتتى،

 دەپ حابارلايدى قازاقپارات ءتىلشىسى ش ق و دەنە شىنىقتىرۋ جانە سپورت باسقارماسىنا سىلتەمە جاساپ.

«تارلان» سپورت كەشەنىندە ءوڭىردىڭ ەڭ ۇزدىك 22 بالۋانى باس قوسىپ، ءوزارا كۇش سىناسقان. قاتىسۋشىلار ابسوليۋتتى سالماقتا ءوزارا مىقتىنى انىقتادى. بالۋاندار اراسىندا شەبەرلىگى شىڭدالعان سپورتشىلاردان بولەك، تاجىريبەسى تولىسپاعان قاتىسۋشىلار دا بولدى. الىپتار باسەكەسىنە ەلىمىز بويىنشا ماڭداي الدى سپورتشىلاردىڭ ءبىرى، «قازاقستان بارىسى - 2013» تۋرنيرىندە توپ جارىپ، قازاق كۇرەسىنەن ابسوليۋتتى الەم چەمپيونى، «الەم بارىسى - 2017» دوداسىنىڭ جەڭىمپازى اتانعان ايبەك نۇعىماروۆ تا قاتىسىپ، بابىندا ەكەندىگىن بايقاتتى. بارلىعى بەس بەلدەسۋ وتكىزىپ، ءار كەزدەسۋىن ايقىن باسىمدىقپەن اياقتادى.

«جارىس جوعارى دەڭگەيدە ءوتتى. بارلىعى جاقسى دايىندىقپەن كەلىپتى. ايتا كەتۋ كەرەك، سوڭعى ۋاقىتتا قازاق كۇرەسى وبلىسىمىزدا ءبىرقالىپتى دامىپ كەلەدى. سەبەبى، مۇندا جارىس جولىنا شىققان ءاربىر جاس قاتىسۋشىنىڭ ءوزى وتە تارتىستى بەلدەسۋلەر وتكىزىپ، شەبەرلىكتەرىمەن تاڭ قالدىردى»، - دەدى ايبەك نۇعىماروۆ.

تۋرنير ىرىكتەۋ سايىسى ەسەبىندە وتكىزىلدى. اقتىق سىندا ونەر كورسەتكەن بالۋاندار ءداستۇرلى جارىسقا اينالعان «قازاقستان بارىسى» دوداسىندا ايماق نامىسىن قورعاماق. «شىعىس بارىسى» تۋرنيرىنىڭ ءوتۋى وسىمەن جەتىنشى مارتە. اسا تارتىستى وتكەن سايىس قورىتىندىسىندا جەڭىمپازدار مەن جۇلدەگەرلەر تومەندەگىدەي انىقتالدى:

1 - ورىن - ايبەك نۇعىماروۆ (سەمەي)

2 - ورىن - ماقسات مازىبايەۆ (تارباعاتاي اۋدانى)

3 - ورىن - ەرلان كونكيەۆ (اباي اۋدانى).

اۆتور: ايان بەكەن ۇلى